رحلة دكتوراه على خط القصيم .. الرياض..!!

[محروم الحب]

هذا يا طويلين العمر والسلامه .. كنت في احد الايام المخضرمه (( يعنني اعرف وشو مخضرم ))اتمخطر على رجلي الثنتين كل ابوهن ..وواحده تذلف قدام وتلحقها رجلي الاخرى بكل غرور<<< لا يا شيخ <<<< عادي كانكم ما قريتوا شي يهيهيهيييييه ..

وبعد جهد جهيد .. وفرك جبهة من حديد .. اكتشفت اني قاطع ثلاثميه كيلو على طريق الرياض - القصيم && رجلي && .. ولم يتبقى على الرياض سوى قليل من الكيلوجرامات <<< يسمع بالكيلو واذا بي واقف على قارعة الطريق و أأشر للسيارات الماحطه .. المتجهة للرياض .. فاذا بماحطة تمحطني وهي صاكة للطبلون .. وانا اطير ثلاثه كيلو .. متحقلقاً بالهواء فلما وقعت كالنورس المتوشح بالسواد <<< مدري وش جابها لكن جازت لي وكتبتها


الوكاد اني طحت - - ومحدش سما علي - - فاذا باللي صدمني يجي .. ويشيلني وانا في حالة وعي اللاوعي << توي سامعها بالتلفزيون .. ومير الرجل يحملني بكل رقة وحنحنية .. ويجدعني بحركة ارق واشد حنحنه في شنطة موتره <<< والله مدري وش نوع موتره .. بس الاكيد انه كشخه يعني يا BM او فياقرا .. بس الظاهر انه ددسن
واغمى علي .. وانا في صندوق الددسن

وما حسيت الا بذاك الشي اللي يمسح وجهي .. انا ظنيت اني بالمستشفى وان يد الممرضه الملساء تمسح على خشتي المعفنه .. بس الريحه ماهي ريحة مستشفى الريحه ريحة حاقات كدا مش كويسه يوم حسيت اني صحيت من جد واثرني اشوف شلة من الجفيرات << وهي عبارة عن غنيمات صغيرات حليلات .. تلعق خشتي بكل حب وشوق .. ولهفه ,,

انا من هول المفاجأة كدت انقز ,, على تلك الجفيرات لابادلها شوقي وغرامي .. ولكني احس انني عاجز عن الحركه .. وياجماعة الربع اكتشفت اني مكتف ومربوط داخل شبك جميل .. لعدد جميل .. من الغنم الجميل ,,

ويالها من ورطه تورططت فيها .. وما دريت الا والشبك يفتح ,, ويطلع ابو الشباب اللي صادمني .. جايب لي معه مويه وشوية اكل .. ويحطهن عندي .. ويمشي ,, وانا اناديه وابو الشباب معطيني اشكل .. وقلت في نفسي << من قدك يا فتافيتو,, صرت مثل ابو عدي تبي تنهي حياتك وسط الشبوك

وبعد ساعات .. قضيتها مع الاخوه والاخوات في شبكنا الموقر .. تبادلنا فيه الاحاديث ,, وتناولنا القهوه والشاهي ,, وكذلك قليل من الحليب بالزنجبيل ,, مع صحن ملئ بالتميرات المنزوعة الفصم ,, كذلك عدد من اطباق الشعير الخاليه من الكوليسترول ,, وقد تعشينا مفطحاً .. حيث اقدم هرفيٌن وش حليله على قتل نفسه من زود الكرم << ونعممممم ,, وقد انهينا السهره بلعب البلوت .. ولكن المشكله ان ما معي ورقة بلوت

8
8
ما ورد اعلاه ,, هو اكبر شخص نصاب في العائله

اللي فاجأني ان الربع في الشبوك .. عندهم خكاريه زينا ,, حيث شفت بام عيني وابوها .. جفرن خكرين مقنذلن رأسه كما عبدالقادر الهدهود .. وجالسن يسمع اغنية لجواد العلي .. وفجأه وانا منخلع من هول المنظر .. طب علينا الاخ اللي صدمني << ياكثر طباته يهيهيهيييييه .. وقلت له : يا بن الحلال فكني .. صادمني وخاطفني بعد ,,

وأخيراً رد علي وقال : انا ابوي مريض ومرضه خطير ولازم اسوي له عمليه !!

قلت : طيب انا وش دخلني ,,, << وجهن يلحس

قال : سمعت انك دكتور كبير ,, بس انك تشفط فلوس خلق الله على كل عملية تسويها .. فقلت اني اخطفك واوفر فلوس العمليه ؟؟؟؟

قلت بكل اندهاش ودهشه وتعجب مفروم بالملوخيه : وشو .. انا دكتور !!!!!! << بنشري ويخب
قال : لا تحاول تنكر ,, القريمه واطحه زي الشمس وكل الادله مسبته عليك ((( قلب فلم مصري )))

قلت : واللي يرحم والديك ,, وش تقول انت وانا اللي اقعد ابتسي عنده واحب يدينه واقول والله ماعودها
اخر مره يااستاد: << متحمس مع الموقف

قال : يا دكتور هالحين ابوديك للوالد ,, تشقشق بطنه و تشوف وش قطع الغيار المطلوبه
<<هالمره قلب ميكانيكي

المهم الرجال اخذني لابوه .. وسدح ابوه على السرير .. عاد انا شفت الدعوه خربانه ,, قلت رح جب لي العده وهي كالتالي : (( ساطوره ,, سكين خضره ,, مسطره وفرجار شطرطون
صمغ جني وان لقيت ,, مسلك بيارات ,, هاته

يوم جاب العده .. صبيت غرا جني في خشم الشايب (( هذا التبنيج ))
ثم صبيت مسلك البيارات ,, في فمه (( غسيل معده ))

ثم سكرت عيونه بالشطرطون ,, علشان ما يشوف وانا اسوي العمليه ,,

ثم جبت الساطور .. بس الظاهر طلع ماهو مسنن ,, علشان كذا حذفته على جنب

ثم مسكت المسطره .. ورسمت على بطن الشايب ,, خط العملية

وبعدين مسكت الفرجار ,, وبديت اشرط بطن الشايب ,, حتى ظهرت لي مصارينه

في هالوقت بلشت ..وش اسوي ,, قلت يا ولد : اتكل على الله ,, واسحب لك قطعه من هنا ولا من هنا ,,

وقمت اعد (( حقره بقره ,, قلي عمي ,, عد العشره ,, واحد ,, اثنين ,, ثلاثه ..الى.. عشره )) وسحبت لي حاجه مدري وشي ,, بس المهم اني قضيت ,, ورجعت لزقت بطن الشايب ,, بالشطرطون .. وطلعت من عندهم على طول ,, ابغى الفكه ,,

ولا زال .. الشايب على حد علمي ,, يرقد في احدى مستشفيات لندن .. حيث يحاولون :

1- يفكفكون خشمه من الاضرار التي لحقت به .. نتيجة لصب غرا الجني فيه !!

2- الى هالحين يحاولون تلزيق رموشه اللي علقت على .. الشطرطون ؟؟

3 - هالحين يدورون له قلب .. لاني الظاهر يوم اني اعد (( حقره .. بقره )) .. طاحت القرعه على قلبه

مايستفاد من هذا الموضوع :

(1) لا تحاول تقطع خط القصيم - الرياض على رجليك
(2) اذا قابلت راعي ددسن ,, ااننننننحش
(3) اذا دخلت شبك لا تنسى تشتري ورقة بلوت
(4) اذا شريت مسطره عليك بام (( 30سم )),, ترى ام (( 15سم )) ما تنفع
5) تاكد من تسنين الساطوره قبل استخدامها ...

(6) اذا كتبت موضوع ..لا تخبص اللغه العربيه على العاميه .. مثل ماسويت انا فوق ..

نقطة انتهى
THE END

محروم الحب

موضوعك طويل مقدرت اخلصه

مثل منت عارف ادرس محو اميه والتعليم على قدنا

لي رده بعد مقراه كله

ميرسيه على هيك موضوع

[ra3boob]

موظوع طوييييييييييييييييييييييييييييييل
تصدق عليك خف دم
لا عمرك تكتب مره ثانيه
.
.
.
.
.
.
أمزح معاك الله يعطيك ألف عافيه

[محروم الحب]

شاكر لكم مروركم الي مال أمه دااعي ..