نهار و مخربها (( رحله الي ملك ))

[نهار]

مساكم الله با الخير

اليوم الاثنين

التاريخ / 8 /8/ 2008

الساعه حوااااااالي 9 ونص الصبح


ترررررررن تررررررن تررررن تررررن << صوت منبه الساعه

طاخ طاخ طاخ طاخ طاخ طاخ << صوت احد يطق الباب

تنتتااااتن تنتتن تنتاااتتن تنتتااااتن تنتتن تنتاااتتن << رنة الجوال


ازعاج وقرقعه واتصالات وناس تطقطق البيبان والاخ نايم


نواف << يطق الباب :: نهاااااااار قوم الساعه 9 ونص قم لا يفوتك موعد الطياره قم ياخي لوعت جبدي وانا اوقضك لي ساعه اطق الباب قم الله ياخذ ها الوجه


نهار << يتمغط ويتقلب :: زين زين بطيت راسي قاعد لا تقرقع على راسي قعدت قعدت الحين بفتح اصبر شوي


نواف :: ياخي قم تراني شارد من الدوام علشان اوصلك المطار ما ابي اتأخر قم ياخي ترى مفيه وقت الطياره بتطير

نهار << يتكلم ونفسه خايسه :: زين قلتلك قعدت روح جيبلي فطور على ما تجي تلقاني جاهز

نواف :: وش اجيب

نهار :: ياخي اي شي جبن بيض اهم شيء ميكون فول بس


نواف:: اوكيه يله عاد لا اجي الا انت جاهز


بعد نص ساعه والساعد تشير الي العاشره صباحا وبعد ان انهى نهار تجهيزاته << تسبح يعني تروش يعني اخذ دوش وجهز الشنطه ولبس وقعد ينطر الفطور

نواف :: طاط طاااااااط ططااااااط

نهار :: يلعن ابو الازعاج على الصبح << يطل من الدريشه يعني النافذه يقول لنواف :: وش فيك تطقطق هرنات يعني بواري يعني زمور با المصري

نواف :: يله تعال اركب كل با السياره وحنا رايحين مفيه وقت

نهار :: زين جايك


نهار شال الشنطه وتاكد من الجواز << ذكي مينسى اهم شي الجواز وبعد تاكد من الفلوس وبطايق البنك << الي يسمع بطايق البنك يقول ملاايين با الحساب


الساعه الحين 10 وربع الصبح ونواف ماسك خط المطار وطاير يبي يلحق على موعد الطياره وبعد يبي يرد بسرعه للدوام علشان ما يصيدونه وهو شارد


نواف ينصح نهار مسوي فيها خبرة سفر

نواف :: نهار انتبه عاد لا تصير ثور يقصون عليك واتورط عمرك هناك خلك حذر وخل عنك الخرابيط وانتبه تشرب مياه غازيه << ميقصد شي وانتبه ترى الدنيا ها الايام تخرع امراض وبلاوي وانت وراك مستقبل انتبه على نفسك

نهار :: طبعا معطيه الاذن الصمخه ولا كنه يسمع شي لانه يدري انه خراط بس يبربر


مر 20 دقيقه والمسافه للمطار حوالي 40 دقيقه والاخ نواف يمشي 180 كم ومطول على المسجل ومعلق الزقاره في الضرس المكسور


نهار :: نواف انتبه ترى صادك الرادار حق السرعه

نواف :: لا يشيخ وينه

نهار :: كان منخش تحت الكوبري شكله صادك

نواف :: يلعن ابو الشغله كله منك ورطتن الله ياخذك انت وسفرتك

نهار :: يبه انطم بس انت الي مسوي زحمة وطاير اصلن الطياره الساعه 12 ونص وانت (مشتط ) يعني متحمس زياده عن اللزوم

نواف :: زين وش رايك تسوق انت بدالي وورهم التذاكر وقول لهم انك مسرع علشان الطياره متفوتك .


نهار :: من صجك انت واذا طلع الشرطي نذل وحجزني تورطني انت معليه يبن الحلال كلها مخالفه وانت ماشي وابشر بكلملك رجال يمسح المخالفه عنك

نواف :: مخالفه هاه زين يا النذل نشوف اذا ما انمسحت والله لخليك تدفعها

نهار :: يبتسم ابتسامة ثقه


بعد خمس دقايق وصل نواف ونهار للتفتيش


العسكري يكلم نواف :: لو سمحت ممكن الرخصه والاستماره

نواف <<يسوي نفسه يكسر الخاطر :: تفضل طال عمرك

العسكري :: صفط على جنب وتعال

نواف يترجى العسكري :: يبن الحلال والله حنا ورانا طياره ومستعجلين ونبي نلحق قبل لا تطير لان الرجال وراه سفر ضروري تكفا يبن الحلال مشها هاالمره

العسكري :: يا الطيب لا تطولها قلتلك صفط على جنب وتعال

نهار << ولا كلمه ساكت


صفط نواف السياره ونزل راح للظابط الي في نقطة التفتيش


الظابط :: ليش مسرع يا الحبيب

نواف :: ياخي والله مستعجلين الرجال وراه سفر ومتأخرين على موعد الطياره وهذا الي خلاني اسرع

الظابط :: ياخي وليه اتاخرون ليه مطلعت بدري علشان تلحق على الموعد بدون سرعه

نواف<< توهق معرف يرد وقال :: عاد هذا الي صار طال عمرك وهاالمره مشها وان شاء الله المرات الجايه نطلع بدري

الظابط :: والله يا الحبيب ودي امشيك بس التعليمات الي عندي الحين تقول ان الي يسرع نركبه با الباص ونوديه للحجز ونشيل سيارته ونوديها للحجز هذي التعليمات الجديده

نواف وعيونها اتناقز :: يبن الحلال غير بدل والله انا مستعجلين والرجال وراه سفر زين عطنا مخالفه وراضين والمره الجايه نوعدك ما اسرع

الظابط :: ابد لا تحاول هذا النظام عليك وعلى غيرك اي واحد مسرع نسويله كذا

نهار يتدخل يعني بيحل المسئله :: زين طال عمرك حنا زي متشوف مضطرين وانا عندي موعد طياره وتعرف لازم الرجال يوصلني وانت تقول بتحجزه وبتحجز السياره كذا بتطوفني الطياره يا الطيب

الظابط :: انت لا تشيل هم بنوقف لك سياره توصلك اما الرجال هذا منقدر نخليه النظام مشدد على السرعه ولازم نطبقه وعلى فكره ها النظام مو عليك بس على الجميع مواطن امير وزير على الكل ما فيه استثناء

نواف يتحلطم ( يعني مو عاجبه الكلام ) ايه على امير انطرني والله ينتفون نجومك الي على كتفك


وبعد اخذ ورد وترجي ومحاولات بائت با الفشل تم وضع الاخ نواف في الباص بنتظار ترحيله الي الحجز وتم ايقاف سياره للاخ نهار لكي يكمل فيها مشواره الي المطار


نهار وهو يودع نواف :: نواف والله اني مضطر اروح ولا ودي اخليك بها الباص بس معليك انا بكلم الربع يجونك ان شاء الله ويدورون لك واسطه لا تحاتي ( يعني لا تشيل هم )

نواف :: اقول اذلف عن وجهي انا داري ان موراك الا الفلس انا وش الي خلاني اجيبك لو مخليك تذلف بتكسي ابرك لي من ها البلشه الي بلشت نفسي فيها

نهار :: يبن الحلال عادي تكبر وتاخذ غيرها الا قولي صج توصي شي من مصر اجيبلك وزه والا ملوخيه با العرانب ترى العرانب اخوان الارانب من ام


نواف والبوز ملتوي :: قلتلك اذلف لا بارك الله فيك ولا في اليوم الي عرفتك فيه

بعدها اكمل نهار مشواره الي المطار معا احد الماره وبعد حوالي 25 دقيقه وصل الي المطار وكانت الساعه تشير الي 11 صباحا وباقي على موعد اقلاع الطائره حوالي ساعه كامله


نهار يسئل احد عمال المطار :: رفيق مافيه هنا بطاقه سوا 100 ريال << فضيحه الجوال سوا

الهندي :: فيه بابا كم واحد يبغى انتا

نهار :: كم فلوس واحد بطاقه


الهندي :: واحد بطاقه بابا 120 ريال

نهار :: ول 120 ليه تقص علي يبيعونها بـ 95 ريال ليه انت بـ 120 ريال تنصب علي انت

الهندي :: بابا هذا مطار مافيه مكان ثاني يبغى 120 ريال شيل ما يبغي خلي روح انتا شيل بطاقه من ثاني مكان

نهار :: جيب الله ياخذ وجهك حراميه كل شي غالي با المطار الشاهي بريالين والماي بريالين لعنبو يلعبون على العالم


بعد شحن تلفون نهار بمبلغ 120 ريال قام نهار با البحث عن رقم الاخ :: كويتي مخربها با الكويت يبي يكلمه علشان يشوف متى طيارته توصل مصر علشان ينتضره اذا وصل قبله


نهار يتصل ::: طووط طووط

كويتي مخربها ::: الو

نهار :: هلا والله مخربها شلونك وش علومك ها وش سويت على اي طياره حجزت

مخربها :: هلا والله نهير انا حجزت على طيارة بعد المغرب قولي انت متى توصل هناك

نهار :: انا اوصل الساعه 2 ونص الضهر وبنتضرك ب المطار لين المغرب زين

مخربها :: زين انتضرني اسمع نهير دقيت على ملك علشان ينتضرك با المطار دق عليه علشان مينسى ويوهقنا نضيع هناك


نهار :: زين بدق عليه الحين بعطيه الموعد متى بوصل علشان ينتضرني


مخربها :: زين معا السلامه


نهار يدور رقم ملك الجن وين الرقم ايه هذاهو طق


نهار :: طوط طوط

ملك الجن :: اهلا بنهااااار ازيك يباشا وحشني ايه حتوصل ان شاء الله امتى

نهار :: ول والله انك جني وشلون عرفت اني مكلمك علشان اقولك متى بوصل

ملك الجن :: اصلي لسا مكلم كويتي مخربها وقلي انك حتتصل علي تديني الموعد الي حتوصل فيه هو امتى صحيح

نهار :: انا حوصل الساعه 2 ونص يعني بعد ثلاث ساعات انتظرني با المطار مو تخليني اولي ترى مدل شي ولا اعرف اول مره اسافر مصر لا توهقني

ملك الجن :: انا حروح المطار من دلوقتي وحنتزرك هناك اسمع انت تعرفني لما تشوفني

نهار :: لا والله معرفك بس بطالع اثور واحد با المطار وبجيه اكيد انت

ملك الجن :: لا ء صحيح اسمع انا حكتب لوحه كبيره حكتب فيها (( فينك ينهااار )) وحنتزرك عند باب الدخول


نهار :: زين زين خلاص موعدنا بعد ثلاث ساعات ان شاء الله


مذيع المطار : على الساده ركاب الطائره المتوجهه الي القاهره سرعة انهاء اجرات السفر والتوجه الي البوابه 22 وذالك لركوب الطائره للاقلاع

نهار يسحب شناطه متوجه للطائره



تم ركوب الطائره المذيع الداخلي للطائره :: اهلا بكم على متن طيران الخطوط الجويه السعوديه نتمنى لكم سفر سعد معنا ونرجو منكم معاودة السفر معنا ... الرجاء ربط الاحزمه استعدادن للاقلاع


(( الجزء الاول من الحلقه الاولى )) (( يتبع غدا ))

[ابــوشـبـريــة]

ههههههههههههههههه



والله راح فيها

نـــــواف


كان قلتلي اكلملك مديرهم<<<<<<<اوخص واسطه


ننتظر الجزء الثاني

[جرووبقاياووح]

هههههههههههههههههههههههه يمه بطني

خوش سفره تراني انا باجر احجز اقرب طياره لمصر والحين ادق على ملك الجن ههههههههههههه

انتظر وصولكم بالسلامه مسكين نواف بعد قلبي

[مشـاعـل الخـالـد]

يعطيك العافيه


بانتظار الجزء الثاني


يثبت

[ملك الجن]

<<<<<<< جاري الإنتظار بالمطار


الساعة الحين منتصف الليل وشوي



نهار قال بيوصل الساعة 2.30 خ14



ياتري اتأخر ليه


أكيد ذنب نواف ههههههههههه

[ملك الجن]

مشاعل مو معتقدة اني وجه حسن


يؤيؤيؤيؤيؤيؤيؤيؤيؤيؤيؤيؤيؤيؤيؤ


يا بت انا احلي منك :)


واسألي اللي شافوني كام :)




ال وجه حسن


<<<< لو بنت كان اتزوج من زمان :)

[برينسيسه]

ههههههههههه
حلوه قصتك مت من الضحك
مشكووووووووور وننتظر الجزء الثاني

[حبسيه]

تسلم الايادي نهار

ومسكين نواف والله

قصة جميلة

يالله متابعة الجزء الثاني

تحياتي