وصية وأحداث ((من قصص التراث))

[ابو مهند]

السلام عليكم ورحمه الله وبركاته



مساكم الله بالخير


هلا وغلا فيكم وحياكم الله حبيت اطرح هذه القصه الرائعه لكم فيها من المتعه والفائده الكثير


اتمنى انها تعجبكم ... واعذرونا عن القصور لاهنتم





من روائع الحكم قصه ووصيه






قصص العرب فيها الحكم والعبر وكثيرا مانسمع بقصص ونقرأ قصص تدور أحداثها حول صفات عربية أصيلة وعاقبة من يخالف الصفات من الأمانة والنصيحة وغيرها والقصة تعد لونا من ألوان الأدب وتختلف من بيئة إلى بيئة آخرى وبحسب الزمن والأحداث ونوعية المتلقي للقصة أي حسب الفئة العمرية والقصة قد تطول حكايتها ولكنها تهدف إلى شيء أو أشياء معينة منها كما ان هناك نوع من القصص الخرافية وهي التي تنسج من الخيال ولكنها تهدف إلى توجيه المستمع إلى معرفة الأشياء السلبية وتجنبها أو الأشياء الإيجابية والعمل بها وبالنهاية القصة الخرافية تدور حول شخصية معينة أو حدث معين وتحبك لغرض الوصول إلى النتائج بتسلسل واقعي وهي بعكس القصة الواقعية التي أبطالها حقيقيون ومستمدة من الواقع 0


وقصتنا هذه تدور حول رجل كبير السن صاحب مال وجاه وله ابن وعندما أحس بأجله وهو على فراش الموت نادى ولدة وقال : أريد أن أوصيك بثلاث وصايا وأريدك تحفظها وتعمل بها .
قال ولده:
ابشر يبه
قال الأب:
الوصيه الأولى
ابن لك بيت في كل ديره
والوصيه الثانية
لاتتزوج أم البنتي وأم الكنتي وأم المسمار اللي ينتي

والوصيه الثالثة

لاتخون من أمنك لو كان خاين

وإذا ضاقت عليك السنين واحتجت شيء عليك بصحيبي فلان في الديرة الفلانية قله انا ولد فلان وأن شاءالله مايقصر معك.

بعد هذي الوصايا الثلاث توفى الأب

احتار الولد في وصايا ابوه .
راح الولد وبنى له بيت في الشمال والجنوب والشرق والغرب المهم سوى مثل ماقال له ابوه وبنى له بيت في كل بلد .

بعد مدة نوى الولد الزواج وكان في الديرة عجوز ولها بنت مزيونة مطلقة ولها ولد من زوجها الاول ويوم سمعت انه يبي الزواج جت له وقامت تمدح في بنتها عنده وتوصف زينها حتى اقتنع بالزواج من بنتها وبالنهاية تزوج الولد بنت العجوز ( المطلقة ).
وبعد فترة من زواجه قالت العجوز لبنتها يابنتى افطنى للعلم اللى اقوله لك انا مازوجتك الرجل هذا الا طمع في ماله وأبيك تسلطين عليه وتحفظين كل ماله لولدك كل ماجاب مال من تجارته تأخذينها منه وتصيرين انت الي تحفظينها له يابنتي لا تنسين ولدك
قالت البنت ابشري يا يمه .
مرت السنين وكل ماجاب زوجها مال وربح من تجارته اخذتها زوجته منه 0 وحجتها إنها تبي تحفظ ماله وسوت الزوجة خزانة في ركن المجلس تحط فيه المال الي يجيبه لها زوجها وهو مايعرف عن الخزانة شيءطبعا .
مرت السنين والولد احواله الماليه صارت ضعيفة ماهي مثل أول وسوت الزوجة سالفة أن المال انسرق وراح رضي بالقدر المهم اضطر أنه يبيع بيتة اللي في الشمال ويوم جاب فلوس البيت اخذتة منه زوجته مثل العادة وتكنزه في الخزانة وتعطي زوجها شيء بسيط من المال يتصرف فيه .
انتهت السنة ورجع الوضع على ماكان راح الزوج وباع بيته اللى في الجنوب وعلى هذي الحال حتى باع كل مايملك من بيوت وزوجته تأخذ منة وتكنز في هالخزانة وكل ماسألها زوجها وين المال الى اعطيتك اياه تعذرت انها صرفته في لوازم البيت .
مرت السنة وطلع الزوج ماعنده شيء من مال وتذكر وصية ابوه يوم قال إذاحتجت شيء وضاقت عليك الدنيا عليك بصحيبي فلان. ويوم من الايام بلغ الزوج زوجته وقال لها انا مسافر ادور رزق الله وشد على مطيتة وحط زهابه عليها وسافر لديرة خوي أبوه0ويوم وصل ديرة خوي ابوه قلط عنده وقال انا ولد فلان وابوي يطلبك الرحمة توفى
وقبل وفاتة وصاني بثلاث وصايا.
الاولى
قال لي ابن لك بيت في كل ديرة
والثانية
لاتزوج أم البنتى وأم الكنتى وام المسمار اللى ينتى
والثالثة
لا تخون من أمنك لو كان خاين
وسويت مثل ماقال لي ابوي بنيت لي بيت في كل ديرة وتزوجت مرأة مطلقة ولها ولد وبعد زواجي منها تغيرت احولي المادية وصرت بعد كم سنة ماأملك شي وجيتك انا ومالى الا الله ثم انت.قال خوي ابوه هلا فيك وحياك الله والله يرحم ابوك عزالله نعم االرجل ونعم الخوي
لكن وش لي اذا رديت مالك لك
قال الولد:
والله لأصير ولد لك طول حياتي
قام خوي ابوه ونادى بناتة الخمس وقال للولد اختر من هن وحدة زوجتن لك.
اختار الولد وحدة منهن .

وقال له ابيك تحفظ وش اقوله لك ابيك ترجع لديرتك انت وزوجتك وإذا سألتك زوجتك وش جبت من سفرتك من مال قل لها ماجبت الا هذي العبدة الخادمة الصماء البكماء.
وأنت يابنيتى
روحى واضربي جسدك بالفحم لين يصير لونة اسود وبيك اذا وصلتم بيت زوجك لا تكلمين ولا كلمة على انك صماء بكماء وابيك تسمعين وش تقول زوجة زوجك من كلام في غيابه وتخبرين بها زوجك اذا رجع.
قالت البنت :
ابشر يابوي
قال خوي ابوه:
وأنت ياولدي امانة الله لا تكشف ستر بنتى لين ترجعون يعني مايجيها كزوج حتى يرجع وهو طبعا مزوجه
قال الولد :
ابشر ياعمى
سافر الولد هو زوجته لديرتة ويوم وصل بيته قابلته زوجته
وقالت له :
بشرعساك في سفرتك جبت لنا مال
قال الزوج :
لا والله ماجبت من عند خوي ابوي الا هذي العبدة الصماء البكماء ابيها تخدم لنا
قالت زوجته:
وحنا عندنا شيء نأكل منه حتى نصرف على هالخادمة
قال الولد:
الشكوى لله هذا الي حصلتة في سفرتي
المهم صارت الخادمة كل شي تقوله زوجة عمها من كلام لأمها تخبر به عمها اللى هو في الاصل زوجها .
ويوم من الايام جت العجوز ام زوجة الرجل هذا لبنتها وقالت لها يابنيتى المال كله انت حاطته بالخزانة اللى في ركن المجلس لولدك ورجلك مايملك شيء ولا نستفيد منه شيء ابيك تطلبين الطلاق منه عسى انه يطلقك وتقولين له انت ماتملك شي يالفقير تصرف علينا وذا طلقك زوجتك بزوجك الاول والخادمة جالسة جنبهن تسمع وش يقولون.
المهم يوم جاء تالي الليل راحت الخدامة يم عمها( زوجها) وقالت له كل السالفة
قال الحين عرفت وين ضاع كل مالى .
يوم اصبح الصبح جت زوجته يمه تشتكي الفقر وتطلب منه الطلاق
قال لها زوجها ماعندي الا أني ابيع البيت واليوم العصر ابجيب الدلال ابيع البيت
راحت الزوجة وبلغت امها العجوز وقالت لها يايمه زوجى يبي يبيع البيت
والبيت حاطه الفلوس به لولدي تصرفي يايمه
قالت امها:
ابشري ابروح يم زوجك الاول اخليه يحضر المزاد على البيت عشان يشتريه
راحت العجوز يم زوج بنتها الاول
وقالت له:
يابو فلان زوج بنتى يبي يبيع البيت والبيت بنتى حاطه المال فيه لولدك لا يفوتك البيت زود بسعره حتى تشترية
قال :
ابزود في البيت لين اشتريه
المهم يوم جاءالعصر وحضر الدلال يبيع البيت حضر الولد وتجار الديرة وحضر زوج بنت العجوز الاول
بدأ البيع وكل مازادوا تجار الديرة زود عليهم زوج بنت العجوز الاول لين وقف البيت علية وشراه
قال الولد :
عندي شرط وهو ماسلمه البيت الا بعد ثلاث ايام لين احصل بيت ثاني اسكن فيه
قال المشتري( زوج زوجته الاول)
مايخالف .
رجع الولد للبيت وطلق زوجته وطردها يم بيت امها
وراح ودخل المجلس وكسر ركن المجلس ويوم كسره حصل الجنيهات والفلوس والذهب مكنوز فيه
قال لزوجتة الجديدة
عطينى خيشة اشيل فيه المال
قالت زوجته:
ابشر
المهم اخذ الولد المال كله اللى في الخزانة على المطية وشال المال عليها وقفل البيت وراح يم الدلال وقال يابوفلان خذ مفاتيح البيت عطها المشتري وأنا ترى لقيت بيت في جنوب الديرة
وسرى الولد هو وزوجتة من الديرة متوجهين يم عمه ( أبو زوجته)
يوم جاء الصبح ودخل المشتري( زوج بنت العجوز الاول) هو والعجوز وبنتها وولدها البيت حصلوا المال مأخوذ وصاحب البيت مايدرون وين راح اختفى من الديرة والعجوز وبنتها أفلسن .
المهم يوم مشى الولد وزوجته حوالى ثلاث ايام بلياليها ومروا غديرا مليان ماء نزل الولد عن مطيته وبرك مطيته وقام وشب ناره وسوى قهوته وراحت زوجته يم الغدير وتسبحت فيه ونظفت ماعليها من فحم وصارت مثل الغزال وجت تمشي لين جلست عند زوجها.
وقالت له:
انا زوجتك وكيف رحت معك وجيت وماعطيتنى حق من حقوقي عليك قال زوجها يابنت الحلال ابوك قال لي امانة الله لا تكشف سترها من يوم تروح لين ترجع.
قالت له:
والله اذا ماتعطينى هذا الحق انى ماعيش معك طول حياتي
قال زوجها:
الشكوى لله
المهم يوم وصلوا ديرة عمه
قال عمه:
من طول الغيبات جاب الغنايم
قال الولد:
ابشر ياعمي بالغنايم والمال والحلال كله
قال عمه:
بشر عساك ماكشفت ستر زوجتك
قال الولد:
لاولله ياعمى هي اللى غصبتى على نفسها أمس
قال عمه:
ياخاين الامانة قم ياصبى دخل يده مع فتحة الجدار هذا ورح من الجهة الثانية واقطع يده
يوم دخل الولد يده مع فتحة الجدار جت زوجته وطلعت يد زوجها ودخلت يدها مكان يده
وقالت:
يبه لو قطعت يده كيف تبيه يعيشني ويصرف علي.
قال ابوها:
شفت ياولدي انت مامسكت من وصايا ابوك شيء
يوم يقول:
ابن لك بيت في كل ديرة
قصدهمعرفة الرجال تعرف على الرجال الطيبة في كل ديرة تحتاجهم
ويوم يقول:
لاتتزوج أم البنتي وأم الكنتي وأم المسمار اللي ينتي
قصدة لاتزوج اللى لها بنت من زوجها الاول وكل شوي رايحة يم بنتها تمشط شعرها او تفقد احوالها
ولا تزوج ام الكنتى الى تزوجت واحد قبلك وكل شوي تعايرك وتقول لك لو كنت مثل فلان فلان كان يسوي كذا وكذا
وام المسمار الي يانتي لاتزوج الى لها ولد وكل حلالك تحفظه لولدها
عليك بالبكر الى قلبها على قلبلك وانت شفت بنتى وش سوت لأجلك
اما قول ابوك:
لا تخون من أمنك لو كان خاين
وانت خنتنى يوم قلت لك لا تكشف ستر بنتى
لاكن تراك مسامح ياولدي مدام حلالك رجع لك وأن شاء الله أنك استفدت وفهمت من اللي حصل لك




اتمنى انكم استفدتم واستمتعتم



تحياتي لكم





دمتم بالف خير



ابو مهند

[راشـد المهمــوم]

الله الله الله

عسا عمرك طويل يا ابو مهند

سالفه كلها حكم

ماننحرم من روائعك المتجدده يالغالي




رويـــشد

[حبسيه]

هلا بأبو مهند


دووووووووووم دوووووووووووووم راعي حكم

ونعم فيك وفي مواضيعك المميزة

تسلمي يا خوي

[فهد بن منصور]

مشكور ابو مهند على سرد هل القصه

تحياتي

[مشـاعـل الخـالـد]

وااااااااااااااااو


وربي قصه روووووووووووووووووووووووووووووووعه


يعطيك العافيه ابو مهند


الله لا يحرمنا جواااهرك التراثيه

دمت بخير

[الأيام]

ابو مهند

يعطيك الف عافيه اخوي على هذه القصه والعبره منها

لك الف تحيه وتقدير

[لسان الروح]

ابو مهند

دائماا متميز في الاختيار

يعطيك الف عافيه يالغالي

تحياتي

[ابو مهند]

هلا وغلا اخوي راشد

حياك الله

وعمرك يطول على خير


مشكور على مرورك الغالي علينا الله يعافيك



تحياتي لك

دمت بالف خير


ابو مهند