*()(*()(الغمـــــــــرة)()*()()*

[الشـريفة نـوارة]

السلام عليكم ...

الغمرة ... مناسبة يحتفلو فيها اهل العروسة بشكل خاص

واعتقد انها موجودة في كتير مناطق ... انها ليلة الحنة



وحلاوتها ... انها تكون عائلية نوعا ما ... تقتصر على الاهل الاقارب

الخالات والعمات ... اهل البيت يعني

واهل اول كانو... يسو الغمرة على السمع ... كيف

يعني ام العروسة ... او اهلها ... ما يعزمو احد ... بس مثلا

فلانة تقول ... فلانة بتسوي غمرة بنتها ... يالا نروح ... وكدا يعني ... مافي عزومة

الكل حياه الله ... والين دحين على حسب الناس

ايوة نرجع للأحتفال ... تقدرو تقولو انها ليلة الحنة

الزفة ... تكون بدري طبعا ... العروسة طبعا تكون لابسة الي تبغا ... مالو لبس معين

الي شايع بين الناس ... اللبس الهندي او البدوي ... واحنا عندنا في المدينة المديني

و يكون وجهها مغطينو ... عشان تطلعلها طلعة في الفرح

والمكان الي تقعد فيه العروسة ... يعملولها زي تكاية بينهم ويحطو فيها زي الستارة ...

وتبدأ السمرة ...

وبما انها ليلة الحنة ... يجيبو الحنة ... ويخلطوها طبعا ... يحطوها في صحن ... والصحن في تبسي

تقيل يكسر اليد ويزينو ... وعاد يبدأو يتناولو من بينهم ... ويرقصو وهما شايلينو ... اذا تععبو خلاص

يجيبو من الحنة ويحنو العروسة اذا كانت تبغا ...

اهل اول يقلك ... وي لازم تتنحى ... دحين مافي ... ريحتها مو حلوة

بعد ما يحنو العروسة ... يتحنو الاهل عاد ... شوية بس

وكمان يحطو الحنة الناشفة ... ويقرطسوها هما وزوقهم ويوزعوها على الناس الي جات

والشي الي انا احبو موت ... بعد ما يرقصو ... يجي دور الغنى

يجيبو الطيران ... تعرفوها اكيد و طبلة الي عندهم

ويبدأو اهلها والي في طبعا الجماعة يعني ... يغنولها او على قول جدة (يتربولها)

... وهي تبدأ بيها الغمرة ... تقول

ويلو اول نشيدي بذكر الله والنبي ... ويلو من ذكرهم ما يشوف باس

ويلو اول نشيدي بالنبي وابن عمو ويلو من ذكرهم يا فتى زال همو

ويلو عروستي قومي ومحلا قيامك ... ويلو والموز لحمك والمشبك عضامك

ويلو عروستي يا جاهلة يا صغيرة ... ويلو في العب تفاحة وفي الفم هيلة

ويلو عروستي يا شمعدان فوق دكة ... ويلو منور على دار المدينة ومكة ... ويلو عروستي يا درة فوق شارة

ويلو من بارك المجس ونصب الستارة ... ويلو عروستي يا جوهرة في وسط صندوق ...

ويلو ما تعرف المسعى ولا طبة السوق ...

ويلو عروستي يا لولوة في ورقها ... ويلو بنت الخبى (بكسر الخاء) من يوم ربي خلقها

ويلو عروستي يا نجمة في سماها ... ويلو بنت الخبى من يوم ربي نشاها

ويلو عروستي انتي القمر واهلك النور وابوكي ما بين الرجاجيل مشهور

ويلو واوصيك يا سبع المرابي عليها مدللة وهرج القفة لا يجيها ...

ويلو يم العروسة الله يتم هناكي ليلة سعيدة والحبايب معاكي ...

ويلو يم العروسة الله يتم سرورك ليلة سعيدة والحبايب يجوكي ...

والعريس ما ينسو ... هو ما يكون موجود ... بس كدا بيغنولو

ويلو عريسنا جانا بدفعو وطيبو ... ويلو يا عمتو يم العروس رحبيبو

ويلو جانا من الدرس فرحان ... ويلو وعمامتو كادى ونرجس ونمام

ويلو عريسنا وايش ادعيت في صلاتك ويلو وجاتك عروسة والله تشرح فؤادك

ويلو عريسنا وايش ادعيت يوم صليت ... ويلو جاتك عروسة على ما تمنيت

وبكدا انتهت التتريبة ... يبدأو الغنى والرقص

وفي جزء اهل العروسة يقولو لبنتهم ... قومي أخطري يا عروسة والبغددة ما تدمشي

وهي انها تقول ... والله ما اقوم ولا امشي ولا يشوف خط نقشي ... حتى يجبلي المقاصب

واربع جوار كشف وشي واربع جوار يفرشو فرشي واربع جوار للمشربية ...

وبكدا لليلتهم ماشاء الله ونس وفرح ...

[مشـاعـل الخـالـد]

ياااااااه مره روووعه

صحيح الغمره حاجه مهمه


حيلل احبها


بالنسبه للحنا دايما انقش يد اوحده

واحيانا الاثنين لكن نقش خفيف

بس زفة العروسه وحناها ولبسها حاجه تجنن


الف شكر بنت مدينتي


دمت بخير

[مشـاري]

مشكورة اختي الشريفة نوارة

عن هل المعلومات والعادات الجميلة عن الغمـــــــــرة وانا كنت اسمع من المصريين عن لليلة الحناء

بس ماقد سمعت فيها في المنطقة الشريقة ^*^

وكل الشكر على تواصلك في قسم التراث

وننتتظر جديدك

مشـــــــــاري

[الفراشة]

يعطيك الف عافيه

خيتوو على المعلوماات الرائعه

[الشـريفة نـوارة]

بجد من اروع الليالي

غاليتي شعولة بنت مدينتي ربي يسعدك للطلة العسل وللحضور الجميل

لاحرمتكـِ

[الشـريفة نـوارة]

هلا وغلا اخويا مشاري

وربي يسعدك للطلة والحضور الجميل




ولاحرمنا متابعتكم وتعقيبكم دوماً

[الشـريفة نـوارة]

الله يعافيكي غاليتي فراشة

وتسلمي للطلة والحضور الجميل


لاحرمتكـِ دوماً متابعة ومتألقة

[ميـــــرنا]

شكرا على الموضوع الرائع
والمعلومات الحلوة
بارك الله فيك ولا يحرمنا من جديدك القادم