قال قصيدك كله مجرد كلام

[ثامرالحماد]

السلام عليكم ورحمة الله وبركاتة


هذي قصيدة اتحدى فيها شخص بغيت اثبتله اني شاعر واني اتعمد اختار الالفاظ السهله واني اتعمد ابتعد عن الالفاظ المبهمه واسمحولي على اي شي واخترت لاول مره من بديت بكتابة القصايد بالفاظ مبهمه تحدي له واثبات اني شاعر فقط هذي المره والتحدي ماهو بالالفاظ المبهمه بس بعد التحدي هو بوشو اقصد بالقصيدة ومن تقرون راح تعرفون مقصدي والسالفة كلهامن اختياري الالفاظ السهله
هذي الكلمات اللي فوق كتبتها لشخص في احد المنتديات بس المره اهديها لشخص اخر وشكر للجميع واسف




قال قصيدك كله مجرد كلام
تهرج بسوالف مالها تاثير

علامك ماتخاف من جامع العظام
قصيدي سهلته بكلامن شهير

هدفي ازيل عن العيون الغمام
بالفاظن الكل فيها بصير

بس شكله التواضع صار حرام
تبغى قصيده صعبت التفسير

ابشر بقصيده ماعليها مالام
مايفهمها حتى فيلسوف نظير

خذ ذي القصيدة بلغزها ابهام
انشدك عن شي صغير وكبير

تقتل من يواليها كيف الخصام
دلفوستن مطربله تذبح كثير

ومعيتن مهبوله تحب الزحام
لحوحتن طلبها لازم يصير

ماتقتنع ولو رفعت الحسام
شقمومتن ماتخاف حسامها شطير

ومغرورتن مبهوره ماتعيش بسلام
كبرها خلاها بالارض تطير

والمقط تلولسه بصدق الاقلام
تبغى بس الناس عليها تشير

وبعضها مصخوط عايش في منام
مايصحى لو جيوشك تستير

ابك يقتلك لو يبادلك الغرام
بقرب فرصه يغدر ويغير

وتعيش دايم اما بنور او ظلام
وماتختلف عند بصير وضرير

وشهي علمني ياهذا الغلام
بدري عليك توك صغير

انا عمري ثلاثة وعشرين عام
بس عقلي نبعه مايه غدير

وعيني تشوف ماتحت الرخام
اقرء قلبك انوره تنوير

ماهو وحي سمه الهام
كل فضل من ربن خبير

ولاتسمي قصيدي ماله مقام
تحاول بهرجك تكسرني تكسير

ماانكسر ولو الكل علي قام
دام مبدئي حسنات القدير

ماني مثل الشعراء بهرجهم ابهام
همهم فلوس او مشهور يصير

ويكذب بشعره يوصل الغمام
كيف طار البشر ماتطير

انا كل شعري عن واقع الايام
ابسطه لين تفهمه كثير

همي انصح من دنيت الاوهام
خايف عليهم من يومن خطير

حاسدني على هذا مكثر الملام
خلك على ظنك مالك تاثير

اليوم اسمي نفسي شاعر الاسلام
بس عندك يابو لسانن قصير

واذا ماعجبك ياظالمني الكلام
تعال اوكلك بيديني شعير

بس عندك اسمي التواضع حرام
وغيرك عادي عندهم ضمير

وبرجع ماعلى قصيدي ختام
للالفاظ اللي معناها شهير

وسلامتكم

ثامرالحماد

[ثامرالحماد]

وهذي معاني الكلمات المبهمه هم اتحداه يحل اللغزوشكرا

معاني الكلمات المبهمه



مطربله>>>>مغطيه


دلفوستن>>>>ماتقدر تقوم او متعاجزه

معيتن>>>>>>عنيده وذي معروفه مايحتاج

شقمومتن>>>>وليده او نشمي او شقردي او هب ريح توصف للرجل الشجاع

المقط>>>الحبل

تلولسه>>>تربطهاو تشربكه

مصخوط >>>>> رجل قليل الفهم ( عليه من الله ظلال )

هذي معاني الكلمات والباقي اظنه مفهوم

[نهار]

مساء الخير

ثامر الحماد مساك الله با الخير

طال عمرك المنتدى هنا للمشاركات الطيبه مثل الفخر والغزل والحكمه وهذا ما نرحب به فقط

اما التحديات الي تتكلم عنها فهذي مرفوضه لاننا هنا هدفنا الالتقاء والمعرفه الطيبه واكتساب الفائده وتبادل الفائده والتعلم من صاحب المعرفه وتعليم من لا يعرف

اذا كان هدفك هو اثبات شاعريتك لاحد غير مقتنع فيها فهذا امر متعب لك وهذا هدف اعتبره خاطىء لان الشاعر لا يهمه اي شخص لا يعترف بشاعريته طالما هو يحافظ على شروط الشعر من ناحيه
الوزن والقافيه والمعنى

هناك ما يسمى با المحاورات تستطيع طلب اي شاعر للمحاوره معه واثبات ما تريد اثباته

اما بهذه الطريقه فسوف يترتب على محاولتك للاثبات امور لا نريدها منها التراشق با الكلمات معا الطرف الاخر وهذا مالا نريده ولا نقبله هنا


نصيحه مني ان تهتم في ما تكتب وتقرء وتطلع وتبتعد عن التحديات الغير مفيده لك تطوير الذات يأتي با القراءه والاطلاع والتعلم من الاخطاء وليس الاصرار عليها


تحياتي لك

نهار

[ثامرالحماد]

مساءالله بالنور اخي الكريم معك حق وانا معاك بكل شي بس اخوي حبيت اسد البيبان عليه وعلى غيره هو مستقصدني مادري ليه يكرهني على العموم اخي الكريم تقدر تحذف المشاركه واذا ماكنت تبغى اقعد في المنتدى ابشر مالك الا اللي يرضيك ماحب اكون مصدر كره لاني قريت اللي بينك وبينه ومابغى افرق بين الربع وانا صح اخطيت يمكن عليه بس لاتلومني بلحظه غضب واسف اذا احد زعلان مني ومثل ماقلتلك اذا تبغاني اطلع ابشر واسف اخي الكريم انت والاخ سلطان مشكورين

[نهار]

هلا فيك ثامر

المحل محلك وحنا نرحب في الجميع والمقصد انا نكون في محل يسوده الحب والاحترام

ودنا اذا اختلفنا نختلف با الراي فقط وبدون لا يتحول ها الاختلاف مصدر كره بينا

عموما ان شاء الله تكون بدايه خير وما بعد الخلاف الا المحبه ان شاء الله


نهار

[ثامرالحماد]

مشكور اخي الكريم اندل هذا الشي يدل على طيب قلبك وطيب اصلك وسعت صدرك ان شالله مافيه كره عمري ماكرهت مابغض احد الا اذا عصى الله بس تعرف لحظه غضب لا اكثر وعسى يكون بيننا دايم الود والمحبه

بارك الله فيك وجعل مثواك الجنه

[سلطان الدوسي]

تحياتي
اسف على التأخير

صح السانك

تقول ::
ابشر بقصيده ماعليها مالام
مايفهمها حتى فيلسوف نظير

لله درّك

فيلسوف نظير ما راح يفهمها كيف أجل بمتذوق للشعر انا بعد اتحداه معاك


تحياتي