اول مشاركة لاتفشلوني ( اعجبتني

[* الـ شـ ـمـ ــرٍي *]

البارحة جاني مـن الحـب مرسـال
من عقب ما بينـي وبينـه خصيمـة

وانا ترى في الحـب مانيـب فعّـال
ولا بعـد ولّـع بقلبـي هشيـمـه

ولا بعد غنّيت فـي ساعـة وصـال
ولا بعد ذقـت الفـراق وجحيمـه

ولا جرى دمعي على الخـد همّـال
ولابعـد جربـت مــرّ الهزيـمـة

حتى وردنـي تالـي الليـل جـوال
وانا على شاهي وبسكـوت ديمـة

الرقم بايخ لكـن الصـوت قتـال
كنه مثل صـوت المذيعـة حليمـة

قالت مساء الخير يـا طيّـب الفـال
قلـت ارحبـي ترحيبـةٍ مستديمـة

بالعود والصفـري ودلـة وفنجـال
واجبك يا بنت الأصـول الكريمـة

ردت بضحكة ثم قالت وش الحـال؟
قلت اشهد إن الحال عقبك سقيمـة

قالت وهي تضحك بعد مثل الأطفال
وانـا بعـد كنـي بدونـك يتيمـة

من يـوم قالتهـا تزلزلـت زلـزال
من فجعتي كنـي مسـوي جريمـة

قلت ارفعي صوتك ترى مابه ارسال
كـذاب لكـنّ المصيبـة عظيمـة

قالت أقول اسمع ترى هرجنـا طـال
ممكـن تصاحبنـي ترانـي وسيمـة

واسمي الحقيقي أول حروفـه الـدال
لكـن يسمّونـي البنـات الزعيمـة

صحيح أحب الفخفخة واعشق المال
لكـن ترانـي طاهـرة مستقيـمـة

ما عندي امغازل ولا (لعب يهّـال)
ما عندي إلا في الشرف والحشيمـة

بس الصراحة قلبي لشوفتـك مـال
واصبحت وحدك جالسٍ في صميمه

فكّر بعقلك واترك القيـل والقـال
واحذر تطيع اهل العقـول العقيمـة

وارسل علي الحين خمسميـة ريـال
أشحن بهـا جـوال أختـي غنيمـة

أو طقم غالي فيه خاتـم وسلسـال
أروح بـه فـي عـرس ولاّ عزيمـة

قلت الحقيقة مانيب رجـل أعمـال
ولانـي بتاجـر والمـوارد عديـمـة

أنا الصراحة شبـه عطّـال بطّـال
وعلاقتـي بالفقـر جـداً حميـمـة

والراتب الله يرحم الحـال مـا زال
محـدود والمصـروف ربـي عليمـه

والدين بـالآلاف والبنـك شغّـال
ياكـل فلوسـي بالربـا والظليمـة

والسوق طايح والغلا ضيّـق البـال
والموت والله صايـر اكبـر غنيمـة

قالت تحمّل بـس والحمـل ينشـال
خلك شديد الباس صلـب العزيمـة

ياخي تصرّف جعلك اتصيـر نشّـال
أهـم شـي إن النوايـا سليـمـة

لابد تفهمني علـى كـل الأحـوال
ما دمت من أهل العقـول الفهيمـة

قلت إيه والله فاهم اللي على البـال
لكن تـرى هـذي علينـا قديمـة

يا بنت هـذا صايـر اليـوم مـوال
للي تبي تلعب علـى ابـن اللئيمـة

يا بنت ما تدرين كـم فيـه محتـال
يلعب على الحبلين وانتـي غشيمـة

يا بنت كم من جاهلة دمعها سـال
من عقب ما جات العواقب وخيمـة

والبنت لا اقفى عرضها بيد الأنـذال
والله مـا يبقـى لهـا أي قيـمـة

قالت تبي ولاّ فخلّك علـى جـال
مهوب ناقصـي نصايـح حكيمـة

عز الله إنك للأسف منـت رجّـال
وانك قليل الذوق ما فيـك شيمـة

يا لعنبو اللي مـا يسطّـرك بنعـال
حتـى يعلمـك الغـزل يـا بهيمـة

( تفو ) عليك وصكّت الخط في الحال
مدري ( تفو ) هي مدح ولاّ شتيمـة

بسم الله الرحمن الرحيم بسم الله الرحمن الرحيم

[مهجول]

صح لســـــــــــــــــــــــــــانـــــــــــــــــكـ ـــــــــــ ولا هنت يالشمري أيه هذي القصايد ولا بلاش نتظر جديدك حبيب البي

[غلا خالد]

صح السااااااانك

ننتظر مزيدك


دمت مميز

[عاشقة الفردوس]

السلام عليكم
أولا اسمح لي أني أرحب بيك في منتداك و منتدانا

صح لسانك تسلم على كلماتك الرائعة

ننتظر مزيدا من التميز و الابداع

[دافـ الدمعه ـىء]

صح اللسان شاعرها .. ولاهان ناقلها

سلمت على هذه الرائعه المجلبه

ورد

[ضيف ساعه]

هههههههههههههههههههههه

هههههههههههههههههه

الله يقطع عدوك يالشمري .. عاد أول مشاركة وسويت فينا كذيه

لا .. وابشرك ان ( تفووو ) اذا جت من بنت فهي مدح

اما من رجل فهي ذم

على العموم صح لساااااااااااانك فديتك

ولا تخليها الأخيرة ترى راح أتابع كل شيء يحمل توقيعك

تقبل مروري والله يوفقك

[سيف الدوله]

الشــــــــــــــــــــمـــــــــــــــري

صح لسانك وارتقاء مميز


لاتحرمنا من جديدك

تحــــــــــــــــياتـــــــــــــــــــي

[نزف الجروووح]

السلام عليكم ورحمة الله وبركاته

مــــــــــراحب فيك اخوي الشمـــــــري منور المنتدي اما اول مشاركه <<<<<<<< لاتعليق


عز الله إنك للأسف منـت رجّـال
وانك قليل الذوق ما فيـك شيمـة

يا لعنبو اللي مـا يسطّـرك بنعـال
حتـى يعلمـك الغـزل يـا بهيمـة

( تفو ) عليك وصكّت الخط في الحال
مدري ( تفو ) هي مدح ولاّ شتيمـة

رد قوي شتيمه صح نقلك ولاهنت ومنـــــــــــور المنتدي للمره الثانيه ننتظر جديد مواضيعك وتقبل مروري المتواضع ....

اخـــــــــــــــــتك نزف الجروووح