%&*الحلم حامد زيد*&%

[%فراوله%]

>>>>>>>>>>>>>> حامد زيد <<<<<<<<<<<<<

في وقت من البطا وبليل تتراقص شياطينه

بعد شفت الضيا ينزع من ثياب المسا ثلثين

تحايلتي المنام اللي مثل بيتك تمرينه

وأنا اللي من تفارقنا وأنا ما غمضت لي عين

غريبة كل حلم مر في رقادي تزورينه

والأغرب كيف احلم الحلم وارجع واحلمه بعدين؟؟

قبل يومين شفتك في المنام وقمت من حينه

ونمت أمس ورجع نفس المنام اللي قبل يومين

أنا اللي قبل أسافر شلت قلبي من شرايينه

تركته في أيدك مثل الأمانة واحفظيها زين

ترى حفظ الأمانة دين مجبورة تردينه

اجل ما في احد قد قالك ترى حفظ الأمانة دين

مرد المقفي بيقفي ويستوفي وتوفينه

بعد ليله, ثلاثة, أربعه, عشره, شهر, شهرين

إذا إنتي ما انتي بقد الكلام اللي تقولينه

حرام استأمنك حاجه وإذا جيت أطلبك تنسين

تخونين وتبين أرضى وأحد يرضى تخونينه

أنا لا جيت أخونك مع حبيبه ثانيه ترضين؟؟

من أول ما رجعت من السفر ما شفت لك بينه

وأنا اللي كنت أحسبك قبل أدوس أرض المطار أتجين

تكونين أنت أول شخص عيني تحتضن عينه

وكنت أتخيلك من زود فرحة رجعتي تبكين

وأشوف بدمعتك حكيك واعرفه قبل تحكينه

وأجيب أحلى من اللي بتحكينه وأتركك تحكين

تقولين الوطن نور وأقول بنور مضوينه

تقولي لي غذيت أحلى وأقول عيونك الحلوين

كلام نام بشفاهك وخفتي لا تصحينه

ذخرتيه الغرام اللي ينام ويتركك تصحين

تغانمتي غيابي لين رجحتي موازينه

تعلم من أيدك لمس الكفوف وعلمك تجفين

وليتك لاقيه به شيء فيني ما تلاقينه

ماهو بغرور لكن خابرك مالك أمل تلقين

تغافلتي بغلا وإلا الحلى ماهوب من زينه

تزينه الصور وإلا الصحيح ابن الحلال زوين

أنا ماني بناقص عنه يوم انك تبدينه

نصيب هو نصيبي لو يسددها من الصوبين

قنوع بمظهري والسم ما يذبح ثعابينه

على قول المثل ماني حلو لكن ماني شين

إذا أهداك الزهر مره فأنا أهديتك بساتينه

وإذا ألهاك بفرح ليله فأنا تهت لبكاك سنين

وإذا استضعفتك أملاكه وشتتك ملايينه

أنا حتى فتات الخبزه اقسمها معك نصين

طموحي بس أجي واظفر بشي تستحقينه

تدينته.. تسلفته.. سرقته.. مو مهم منين

كأني من كثر ما أرضى بكل اللي تمنينه

لو انك تطلبين الله يعنيني بقول آمين

أنا ما العب على الحبلين وقت الطيش وسنينه

تبين الحين يوم إني كبرت العب على الحبلين؟؟

ترى عند البدو بالذات عيب اللي تسوينه

حلاتك لا عشقتيني تعشقيني ليوم الدين

غرام نسكن ضلوعه حشيمه من مجانينه

جفا يجمع معزتنا ولا عشق يذل اثنين

كثار اللي تحدوني وقالوا لي تحبينه

أمانه لا تخليني صغير في عينهم تكفين

لأني كل ما قالوا تخون أقول: مسكينة

عليك الله وأمانه علميهم من هو المسكين؟

أنا خايف ألا طاح الجمل تكثر سكاكينه

وأنا ما عادت ضلوعي تحمل طعنة السكين

مثل ما قالوا: المكتوب واضح من عناوينه

لو ارحل منك للغربة بسافر من ظلامك وين؟؟

كفاية كل حلمي مر في رقادي تزورينه

كفاية من تفارقنا وأنا ما غمضت لي عين

قبل يومين شفتك في المنام وقمت من حينه

ونمت أمس ورجع نفس المنام اللي قبل يومين



وسلامتكم

اكيد عجبتكم الكلمات لانه من الفنااااااااان حامد زيد ومنقول للامانه

[$$عطر الكلام$$]

غاليتي فراولة

قصيدة جميلة عزيزتي لشاعر راقي
بالـتأكيد عجبتنا وتستحق كل إطراء وإشادة
دمت على روعة الانتقاء
وفي انتظار جديدك المميز دوما

أرق التحايا

[.. الـريــــم ..]

حامد زيد //
طبعأ ولا اروع

تسلمين على النقل فراولة .. تحيييييييياتي لـج

[%فراوله%]

عطر الكلام مشكوره على المرور الورعه
الريم مشكوره على احلى مرور

[حقوق الانسان]

يعطيك العافيه قصيده فعلا جميله

وانا من المعجبين بقصايد الشاعر الرااائع حامد زيد

لك تحيتي

[%فراوله%]

يعطيك العافيه على احلى مرور حقوق الانسان

[!@ولد@الكويت@!]

فراوله تسلم يمناج علي النقله الرائعه

وصح لسان شاعرها

[عذوبه]

إذا أهداك الزهر مره فأنا أهديتك بساتينه

وإذا ألهاك بفرح ليله فأنا تهت لبكاك سنين


الله ياحامد زيد اميز شعره بين ملون

فراوله

تسلم الأنامل

/
/
/

عذوبه