ودك تسكن في عمارة ناطحة للسحاب .

[MD OMAR]

ودك تسكن

في عمارة ناطحة للسحاب
الجواب بعد القراءة

هناك ثلاثة من الشباب الفلة .. يحبو المتعة والمرح والجو الحلو .. يحبو جلسات الشباب والفرفشة والهياصة والنكت .. يحبو السفر والمتعة بالمناظر الخلابة الأخاذة .. وفي كل سنة للأصدقاء الثلاثة سفرية إلى أحد مدن العالم الفسيح .. ولما جات الإجازة الكبيرة جات هرجت السفر وكل واحد من الثلاثة يقترح دولة للسفر إليها .. واحد قال : أنا هاوستني عمائر ناطحات السحاب أيش رايكم نسافر لدولة تشتهر بناطحات السحاب قاله خويه ياحبك للنطح مو كفاية تيسكم إللي في بيتكم .. المهم عجبتهم فكرة صاحبنا .. وسافر الثلاثة إلى دولة فيها عمائر ناطحات سحاب .. وأول ما وصلوا لصالة المطار وركبوا التاكسي سألهم على فين قال صاحبنا نبغي أطول عمارة عندكم .. قال راعي التاكسي في نفسه أكيد إنهم مجانين ما علييا أهم شي الأجرة .. المهم نزلهم عند أقرب مبنى من 90 تسعين دور وقال هذا أطول مبنى فين الحساب .. نزلوا الثلاثة فرحانين ودايركت على الرسبشن أحجزلنا في آخر دور يعني الدور التسعين قلهم في قبل التسعين قالوا التسعين يعني التسعين قال طيب بس ياحلوين في تعليمات مشددة عندنا في الفندق .. خير ياطير .. قال أولاً : الرجوع للفندق قبل الساعة الثانية عشر ليلاً ولو تأخرتوا دقيقة واحدة حنفصل الكهرباء عن المصعد وتطلعوا بالدرج ثانياً .. وثالثاً .. قالوا بسيطة المهم إحنا جاين ننبسط وبس ماعليك .. المهم السكاكر الثلاثة كل يوم يخرجوا من بدري ويهيصوا صح .. وفعلاً يرجعوا قبل الساعة الثانية عشر ويوم من الأيام وصلوا للفندق بعد الساعة الثانية عشر بدقيقة واحدة .. واللي والمصعد مفصول .. حاولوا مع المدير .. يابويه غيّر بدّل شكّل .. مافي فائدة .. الدرج يعني الدرج .. تحاور الثلاثة ( سووير وعووير واللي مافيه خير ) ووصلوا لخطة قال الأول : أنا أنكت لكم وأضحكم الثلاثين الدور الأولى .. عشان ماتحسوا بالتعب .. قال الثاني : أنا أقص لكم عن بطولاتي ومغامراتي من الثلاثين دور إلى الدور الستين .. عشان ماتحسوا بالتعب .. قال الثالث : أنا ماعندي لا نكت ولا بطولات الحقيقة ماعندي إلاّ حكاوي الهم والغم .. خلوني في الأخير أحسن من الدور الستين إلى الدور التسعين .. وبدأ الصعود بالدرج الدور الأول .. الخامس .. السابع والعالم شغاله ضحك وضحك وصهلله .. وصلوا للدورالثلاثين .. بدأ خوينا الثاني : انا سويت .. وأنا سويت .. وفي مرة حصل كدا وقمت سويت وهات يابكش مسوي بطل الأخ.. منسجمين إلى أن وصلوا للدور الستين بشق الأنفس .. جاء دور أبو الهم .. قال لهم : جاء دوري الأن أغمكم .. قالوا : مايبغالها اللي فينا مكفينا أحسن لك تسكت .. وراح الكثير مابقي غير القليل .. قال لهم غصباً عنكم لازم تسمعوا ترى لمصلحتكم .. قالوا له : مانبى نسمع .. قال : انتوا أحرار ورايحين تندموا .. المهم وصلوا للدور التسعين .. قال أبو الهم ماتبوا تسمعوا قالوا خلاص وصلنا الله يمتحنك .. قال خويه خلينا نسمع قول أيش عندك قال : ياحبايب مفتاح باب الشقة نسيتوا في السيارة ..
أخي الحبيب : لو كنت معاهم أيش رايح تسوي فيه ..
أحبابي لهذه القصة مغزى لطيف .. المقصود بالعمارة هي حياة الإنسان لأنه من بداية عمره إلى الثلاثين سنة حياته كلها لعب ولهو وغفلة وجري وراء المتعة واللذة لايحب الجدية ولاالتكاليف الشرعية ولايعمل للأخرة إلاّ من رحم الله .. ومن سن الثلاثين إلى الستين حكاوي كبار السن ياولدي إحنا كنا وإحنا كنا .. وياأرض إنهدي ماعليكي قدي .. ومن سن الستين إلى التسعين شكاوى وأمراض وهموم ضغط وسكر وقلب ووووووو ...
فمادام مسيرة الحياة انكشفت أمامك الآن .. فلماذا لا تغيير هذا السيناريو .. وتعيش حياتك في طاعة الله .. لتحصل على سعادة الدنيا والآخرة .. وتذكر دائماً حديث الحبيب صلى الله عليه وسلم : ( لن تزولا قدما عبدٍ يوم القيامة حتى يسأل عن أربع , عن عمره فيما أفناه , وعن شبابه فيما أبلاه , وعن ماله من أين إكتسبه وفيما أنفقه , وعن علمه ماذاعمل به )
أسأل الله أن يبصرنا بأمور ديننا ودنيانا وأن لايجعلنا من الغافلين ..
محبكم : MD . OMAR
وفي أمان الله
كتبتها بتاريخ
2/8/1428هـ

[سعودي مرجوج]

يعطيك ربي الف عافيه اخوي

جزاك الله الف خير ما قصرت حبيب قلبي

[المستشار 07]

جزاك ربي الف خير اخوي ع القصة الجميله منها الإفادة والمتعة سقيتنا الله يسقيك من بئر الجنه ..

تقبل مروري يا الغالي :

[الأيام]

Md . Omar
يعطيك العافيه اخوي تسلم اولا على القصه البسيطه وروعتها

تسلم على العبره من هذه القصه

جزاك الله خير

لك تحيتي

[نوارة الخليج]

MD . OMAR

يعطيك العافيه اخي الكريم على هالقصه

وجزاك الله كل خير على توصيل العبره منها لكل من قرأها

ودمت بخير

[نهر الوفاء]

الله يجزاك الخير كله
ويجعل ذلك في ميزان حسناتكم
لك تحيتي وتقديري ،،،

[MD OMAR]

كل عبارات الشكر والتقدير والثناء .. لمن نوروا قصتي بردودهم : سعودي مرجوج و المستشار والأيام ونوارة الخليج ونهر الوفاء .. لكم من صميم قلبي الشكر والإحترام .. وأشكر الإدارة الحكيمة على وضع وسام التمير على القصة وهذا فخر وشرف لى .. وأوعدكم بقصة في غاية الروعة بعنوان ( الملك المنفي )

تقبلوا خالص تحياتي :
الأستاذ : محمد عمر MD Omar