( ددسن ) تعزك ولا ( خطوط ) تذلك !!

[رمـاد الشـوق]

السلام عليكم ورحمة الله وبركاته

وشلونكم عساكم بخير

.
.

يالله حي حقين المواضيع الجاده مبطين عنكم

اليوم انا جاي بفضفض عندكم وبحكيلكم موقف صارلي مع حبايبنا الخطوط السعوديه ( نعتز بخدمتكم )

بطلع لكم كل اللي بقلبي لأني شايلن عليهم مره

قبل فتره كنت معزوم على عرس صديق عزيز علي جداً في ديرته قريبه من تبوك والرجال ملزم علي ويستاهل بصراحه من يتعنى عشانه قلت ياولد احجز بالطياره وش يوديني تبوك آخر الدنيا وفعلاً حجزت يوم الاربعاء الظهر وكل شي زي الحلاوه

جيت الاربعاء قبل الرحله بساعه احتياطاً عن التأخير وطلعنا الطياره وربطنا الاحزمه نستعد للإقلاع لكن الطياره ما اقلعت قالو انتظرونا 45 دقيقه عندنا خلل بسيط

وبقدرة قادر الـ 45 دقيقه تحولت الى ساعتين وعليها واحنا جالسين بالطياره بعدين قالو انزلوا للمطار وبنطلعكم على طياره بديله قلنا خيره ان شاء الله

جلسنا بالمطار من الساعه 3 العصر الى الساعه 9 بالليل وياليتهم قالولنا بنتأخر كان على الاقل الواحد يمديه يرجع لبيته ويرتاح ويرجع لهم لكن اي واحد تسأله يقولك نص ساعه بس وبنطلعكم < -- الظاهر النص ساعه عندهم قاعده تولد

يوم جت الساعه 9 تكرم علينا موظف وقالنا الرحله تأخرت لين الساعه 12 بالليل انا في هاللحظه فقدت اعصابي وتهاوشت معه وقلت انا هونت حتى لو الطياره بتطير الحين مابي اروح رجعولي فلوس تذكرتي < -- بما اني قصيت البوردينج خلاص ماقدر ارجع التذكره لو اطلع مع الباب تروح علي

كلمه مني وكلمة من الموظف تشادينا بالكلام وجا المدير و وقف بصفي وهزأ الموظف وقاله انت المفروض تتحمل المواطنين ومن هالكلام المهم اخذني المدير بيدي وهداني وقالي احنا نعتذر واللي تبيه يصير تبي فلوسك الحين ارجعها لك لكن ترى عندنا رحله بكره العصر ومستعد الحين احجزلك عليها والليله نخليك تبات في فندق صحارى المطار ومالك الا طيبة الخاطر ..

انا ارتحت شوي بعد كلامه وقلت له اووكي احجز لي بالرحله اللي بكره لأن عرس الرجال اساساً الخميس بالليل وقلت له مابي منكم لا غرفه بالفندق ولا شي عندي بيت ابي بس تغيرلي التذكره وكل شي تماام

غيرلي التذكره ابن الحلال ورجعت للبيت بعد اكثر من 10 ساعات بالمطار هدت حيلي

ثاني يوم رحت للمطار وطلعت الطياره وهالمره اقلعت بالجو قلنا زين الحمدلله

بعد حوالي 40 دقيقه طيران قالوا الطياره فيها مشكله وبتغير مسارها ولف بنا على جده


نزلونا جده على المغرب وطبعاً انا الحين خلاص لا عاد يمديني على عرس خويي ولا عاد لي بتبوك حاجه ابي بس الريااااااااض

طلعت ورحت للصاله الثانيه وغيرت تذكرة العوده من تبوك وحجزت على الرياض وكان فيه رحله بعد ساعتين طرت عليها راجعاً لموطني الأصلي احمل في قلبي كل حقد وضغينه على الخطوط السعوديه وعلى كل من يعمل فيها


مايستفاد من الموضوع :

ان كان عندك شغل ضروري لاتفكر ولا يوسوس لك ابليس ويقولك احجز يارجال على الخطوط اريح لك ساعتين وتوصل اركب سياره حتى لو انها ددسن 82 وربك يسهلها

ولاحد فيكم يتفلسف ويقول فيه سما و ناس ترى والله ماهوب احسن لكم والله غير تقولون الله يحلل الخطوط السعوديه

تحياتي للجميع

[عذوبه]

اقووول بس احمد ربك وصلت لبيتكم ==>>تقول في قلبها يازين الأرض زيناااااااااااه

ولا بعدين يصير فيك مثل مسلسل Lost

وبعدين وش لك في صجة الطيارات وخرابيط التكنلوجيا

شوف جدودنا قبل كييييف على سفينة الصحراء الرشيقه وتهيجن ووناسه

ولا الخطوط السعوديه لاتشره عليها

وبارك لخويك على العرس وعقبال العزاابيه

/
/
/

عذوبه

[*جهراويه عسوله*]

هههههههههههههههههههه
معاناه والله
انا لو منك كنت قطعتهم تقطيع شنو احنا لعبه عندهم
بس والله اخوي يا رماد انت عطيتهم ويه زياده انزين على الاقل كنت نمت بالفندق وخسرتهم جم بيزه احسن لا تطلع من المولد بلا حمص خخخخخ
عموما مثل ما قلت لو تركب ددسن احسن ان شاء الله دبابه المهم توصل بلا منه الطياره
وعلى فكره عندنا وعندكم خير حتى احنا بالكويت تجينا هالحالات
عموما تسلم اخوى رماد لانك فضفضت لنا عن المكبوت داخلك
والله يعين الزباين

[صبا نجد]

هههههههههههههههههههههههههه

رماد والله ميتة ضحك على سالفة انهم ودوك لجدة حسبي الله عليهم يعني يكون الواحد مضطر وحالته حالة ويغيرون اشغاله واتجاهه على كيفهم


سوالفهم ما يخلونها حسبي الله عليهم
واكثر شي يقهرني الكذب ليه ما يقولون الحقيقة ليه ما في مصداقية
يخلونك تتبهذل وتجلس مستهينين فيك

اااااااااه يا لي سوالف معهم بس خليها على الله


المهم انك وصلت للرياض ما فرقعت الطيارة فيك وانت في الجو



ميغسيه على هيك طرافة

[نهر الوفاء]

ياطول بالك طولاه

ويا قو قلبك ما شاء الله .. انا أهون عن الرحلة ما دام الطيارة عطلانه

العمر ما ينلعب فيه ... ياخوي هذه مافيه كسور وتطيب هذه مووووووووت

حياك اخوي:

نحتاج نرقى كثيرا بحقوق المواطن بقوانين تظمن حقوقه مثل ما تظمن للشركات حقوقها

لو وجد نظام تعويض للمواطن كان حرصت الخطوط وغيرها في الاهتمام بكل شئ

تخيل الوقت المهدر والقلق النفسي ... كم يستحق تعويض مادي على الاقل ؟؟؟

بس زواج صديقك الثاني انتبه لا يودوك السودان ويطلبون منك ترجع سباحه لضباء

ومنها بالسيارة لتبوك هههههههههههههههههههههه

منور الجاد رماد .... تحيتي لك

[حقوق الانسان]

آآآآآه ه ه ه من السعوديه آآه ولا يفقع المراره الا شعارهم ( نعتز بخدمتكم )

يارجال الحمد لله على سلامتك يوم رجعت بيتك سالم هذا اكبر انجاز للعوديه

ووالله فعلا مثل ما ذكر اخوي نهر لازم يكون فيه تعويض للمواطن تطالب به الخطوط وراح تشوف كيف يمشون مضبوط اما شغلهم الي الحين ما ينفع ابد

الله يكون بالعون

تحيتي لك رماااااادووووه

[غريب الدار 123]

بسم الله الرحمن الرحيم
الحمد لله على سلامتك وإنك عدت بخير وسلامه لديارك
والله يبارك لخوك لعرس ويطعمه الذريه الصالحه
اكيد لازم يكون في تعويض عن التاخير اذا زاد عن ساعتين

[رمـاد الشـوق]

اقتباس   المشاركة الأصلية كتبت بواسطة عذوبه اقووول بس احمد ربك وصلت لبيتكم ==>>تقول في قلبها يازين الأرض زيناااااااااااه ولا بعدين يصير فيك مثل مسلسل Lost وبعدين وش لك في صجة الطيارات وخرابيط التكنلوجيا شوف جدودنا قبل كييييف على سفينة الصحراء الرشيقه وتهيجن ووناسه ولا الخطوط السعوديه لاتشره عليها وبارك لخويك على العرس وعقبال العزاابيه / / / عذوبه

اي والله صادقه الحمدلله بس على السلامه

مره ثانيه اذا انعزمت اروح ببعير اضمن لي على الاقل مايوديني جده ويقول عطل فني

منوره عذوبه