وش صار بالدنيا ؟!!!

[رمـاد الشـوق]

السلام عليكم ورحمة الله وبركاته

كيف حالكم جميعاً ان شاء الله بخير

بصراحه فيه موقف صارلي اليوم وأثر فيني حيل وطول اليوم قاعد افكر فيه وحبيت اكتب لكم اللي صار لأني بصراحه للحين مو مصدق !!!

السالفه بدأت اليوم الصباح لما صحيت قبل اذان صلاة الجمعه وطلعت من البيت مستعجل بلحق على المغسله اجيب ملابسي قبل تقفل ..

المهم وانا بالشارع شفت لي شايب كبير في السن عمره تجاوز الثمانين سنه على الأقل يمشي على رجلينه بالحر وقفت وعرضت عليه اني اوصله طلباً للأجر وفعلاً ركب وقالي اوصله للمسجد ..

وصلته للمسجد وقلت له شف تراني بروح للبيت اغير ملابسي وبصلي معك بنفس المسجد وبوقف سيارتي هنا اول ماتطلع تعال اركب معاي عشان ارجعك في البدايه رفض وقالي مايحتاج جزاك الله خير لكني اصريت عليه وفعلاً بعد الصلاه انتظرته وجا ركب معي عشان ارجعه لبيته ..

بعد ماركبنا طلب مني اوديه لمطعم على الطريق عشان يشتري غداء وبصراحه استغربت كيف شايب بهالعمر ماعنده احد بالبيت يطبخ له وبيشتري غداء من مطعم ؟؟ حاولت اعزمه يتغدى معي بالبيت واصريت عليه لكنه رفض رفضاً تاماً وقلت اجل ابشر وديته للمطعم وطلب نصف دجاجه مع الرز !!!

بيني وبينكم انا استغربت جداً منه لكني سكت و رحت اوصله لبيته وتفاجأت لما وصلت ان بيته عباره عن غرفه في سكن عمال يمنيين وهنود ومنظر المكان اللي ساكن فيه جداً مؤثر خصوصاً ان الرجل باين من لهجته وهيئته ولبسه انه سعودي ومن اهل نجد 100% وكأنه واحد من شيباننا نفس سوالفهم ونفس كلامهم !!

قبل ينزل ماقدر اكبت فضولي اكثر من كذا وسألته انت وش سالفتك ليش ساكن هنا وين اهلك وين عيالي ؟؟

الرجل حكالي قصته وياليته ماحكاها اقسم بالله انها مصيبه

تخيلو الرجل يقول انه عنده عيال واجد ورجال كبار متزوجين وعندهم عيال وانه كان عنده حلال واراضي وعمائر مأجرها و حالته الماديه ممتازه لكن عياله رفعوا عليه قضية حجر بالمحكمه وجابوا تقارير طبيه انه مريض ومختل عقلياً واخذوا حكم من المحكمه انهم يديرون كل املاكه وتقاسموها وطردوه !!!!

ويقول انه الحين صارله سنتين عايش على الصدقات و الزكاة وينتظر ربي ياخذ امانته ويموت وقالي ان الشي الوحيد اللي خايف منه انه يموت بغرفته وماحد يدري عنه !!!

اقسم بالله يا جماعه كلام هالرجال طول اليوم يتردد ببالي وماني مصدق معقوله وصلنا لهالمرحله ؟؟

كنت اشوف مثل هالقصص بالدراما والمسلسلات الخليجيه وكنت اقول في نفسي كلام مسلسلات بعيد عن الواقع وآخر شي توقعته انه يكون حقيقه لا و بالرياض بعد !!!!!

معقوله الفلوس تخلي الابناء يرفعون قضيه على ابوهم ويرمونه بالشارع في هالعمر خصوصاً ان الرجل اللي انا شفته باين عليه رجل جداً محترم وراعي دين ...


وبعدين كيف القاضي بهالبساطه حكم لعياله وطرده بناءً على تقارير طبيه ماينعرف صحتها ؟!!!


استغفر الله العظيم

استغفر الله العظيم

استغفر الله العظيم


في الأخير نزلته لبيته وعطيته رقم جوالي وقلت له اذا احتجت اي شي او بغيت اي مشوار اتصل علي ...

بصراحه مادري وش اقول اكثر بس تراني لازلت للحين مصدوم من اللي سمعته منه !!

تحياتي للجميع ,,

[مشـاعـل الخـالـد]

السلام عليكم ورحمة الله وبركاته

حسبي الله ونعم الوكيل فيهم

عقوق عشان وسخ دنيا ؟؟؟؟

حسبي الله ونعم الوكيل فيهم وربي يقطع القلب


الله يسعدك يارماد وهالشي يدل على طيب اصلك ....


وربي قهر قهر ....

[عذوبه]

يالله

ياربي رحمتك ..!

والله مدري شقوول ==>>خانقتها العبره

هذا موقف صادفك يارماد والله اعلم كم فيه منه بمجتمعناااا

الفلوس الله يلعنها تخليهم يسوون كذا بأبوهم !!!

ان كان فيهم خير له الله يهديهم ويردهم لصوابهم

وان كان مافيهم خير حسبي الله عليهم منتقم جبار


وجزاك الله خير اخوي رماد على ماسويته

وكثر الله من امثااالك

/
/
/

عذوبه

[صبا نجد]

صراحة يا رماد والله بكيتني

بالله عليك تردد عليه بين فترة وفترة يمكن الله سخرك له بدل عياله




حسبي الله ونعم والوكيل

[نهر الوفاء]

حسبي الله ونعم الوكيل
صدقني ما راح يربحوا لادنيا ولا أخره
وراح يردوا لهم أولادهم نفس الحكاية

ياليت اخوي تبحث عن احد من اهل الخير
اما يتكفل برفع دعوى يطالب عياله تأمين سكن وحاية كريمه له
او على الاقل يستأجر له سكن في مكان آمن ... وضمن له عيشه كريمه

اللهم لاتكلنا إلى أحد من خلقك وارحمنا برحمتك يارب ..
جزيت خيراً أخوي رماد واكسبك ثواب ما صنعت وابشر بالخير أخوي دنيا وأخره

[رهين الدموع]

والله مدري شقول

حسبي الله ونعم الوكيل

استغفر الله العظيم

[نوارة الخليج]

السلام عليكم ورحمة الله وبركاته

((وَقَضَى رَبُّكَ أَلاّ َتَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَن عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَا أُفٍّ وَلا تَنْهَرْهُمَا وَقُل لَّهُمَا قَوْلاً كَرِيمًا ّ وَاخْفِضْ لَهُمَا جَنَاحَ الذُّلِّ مِنَ الرَّحْمَة وَقُل رَّبِّ ارْحَمْهُمَا كَمَا رَبَّيَانِي صَغِيرًا ))

مع الأسف اللي صار هذا قمة العقوق

ولكن الدنيا سلف ودين

ورح يتذوقو مرارة مافعلووو بوالدهم

اسأل الله لهم الهداية والصلاح وتعويض ذالك الأب عن مافعلووه به

يعطيك العافيه رماد الشووق

وجزاك الله كل خير على مساعدتك لذالك الرجل المسكين

ودمت بحفظ الله

[نزف الابداع]

لاحول ولا قوة الا بالله

رماد أحزنتا والله ياليت أنك تواصل عليه
وياليت ترسل لي على الخاص عنوانه


شاكر لك أخوي


أخوك

نزف الابداع