جى جى خطبها نصيب اوووه خطبها نصيب// كبسة زر وتكون داخل العرسْ

[الــ ـجـ ـازي]

[frame="7 80"][align=center]



طق طق طق على الباب: وجععععععع من اللي جاينا هالحزه>> اهوجس
فتحت الباب وياليتني مافتحت..
اللي اتذكره اني شفت زول اسود و شفت براطم وامممممممطخ وانواع السعابيل
وبعد مااستوعبت ان اللي دق الباب جارتنا ام رمضان >>> مب رمضان الشهر>>احلفي
وايقنت ان اللحظات اللي عشتها قبل شوي كانت عبارة عن تمطيخ من قبل ام رمضان يقالي مشتاقه

مسحت سعابيلها اللي بخدودي بكُم قميصي>>> ياعيني على النظافه
وقلت: ياهلا بام رمضان.. اوقفي بالباب الين انادي امي>>>الله من زين الاستقبال

واتجهت عند الصاله حيث كانت امي تليّن=تاخذ قيلولتها وقلت: يمه يمه يمه يمه يمه جارتنا ام رمضان بالباب تبيك
راحت امي لها ودخلوا المجلس وصكوا على نفسهم وانا كأي بنت بريئه لزقت اذني بالباب اتسمع وش يقولون

امي: هذي الساعة المباركه اللي شفناك فيهااا ياام رمضان.. بس وراه جايه بدون موعد!! عسى ماشر؟؟؟
>
>>>>>>>>>>> ياحليل امي تدق بس بذوووق

ام رمضان: ماشر يوخيتي وحنا جيران وحبايب ومابينا مجاملات ومواعيد .. عاد انا قلت اسيّر عليك واشرب معك

فنجال قهوه ونسولف>>>> تلمّح وين القهوه..

عاد انتم شلونكم شخباركم شلون عييلك وبنيتك المزيونه؟

انا سمعت كلمة مزيونه وابدأ اهوجس .. امي مالها بنت غيري لايكون متزوجه على ابوي من ورانا وعندها بنت من

زوجها الثاني>>>>> الله ياخذك على هاالتفكير

قالت امي: قصدك الجازي >>>>>> امي بعد استغربت

ام رمضان: وانتي عندك غيرها؟

امي: الحمدلله! ماغير تاكل وتنام وتلزّق عند الانترنت ..?حست امي انها خبصت بالكلام وتبي تصلّح كلامها وقالت: ياعمري

عليها مقطعه نفسها تقطيع بالمذاكره وشغل البيت طبخ وكنس وشطف شايلتن البيت كله فوق راسها


ام رمضان: ياحبيلها.. وانا ولدي رمضان يبي يكمل نص دينه ويعرس ومالقينا احسن من بنتك الملوسنه

انا كذا صار وجهي>>>>>

امي: هذي والله الساعة المباركه مهب لاقين احسن من ولدك رمضان ..بس ابشاور البنت وابوها ونرد عليكم ان شاء الله

انا من بعد هالكلام ماصرت اسمع شي ولا ادري وش قالوا

دخلت حجرتي ابي هدووووووء وجبت لي خبز حار وشاهي وحزمة كراث وآآه آآآه انا حروفي في غيابك لاهي حكي<== علىبالها قصيميه

ولاهي قصيد>>>>>> كناية عن الرومانسيه

واسترجعت شريط الذكريات واتذكر ملامح رمضان ولد ام رمضان

صحيح ان شعره عراده وماعمره تروش وعيونه متطاقات>> كناية عن الحول


وصحيح انه قصير يالله ياصل 150 وبالواسطه.. وصحيح انه دب وغبي ومايعرف يتكلم ومحد يحبه ومحد يطيقه بس ولوو

مايمنع انه رجل وسيم والف بنت تتمناه

بعد التتنيح والتفكير نزلت الصاله وجلست قدام امي ابيها تفاتحني بالموضوع

بس ماااش ساكته قلت يمكن تحتري ابوي يجي وتاخذ رايه قبل

عاد انا دقيت على ابوي استعجله يجي>>>>> ياشين اللي مابقلبهم صبر

طووووووط طوووووط

ابوي: الوووو

انا: هلا يبه وينك فيه؟ تراك طولت متى تجي؟

ابوي: ليه وش فيه؟

انا: لامافيه شي بس اشتقت لك >>>>> ابووووك يالسبب

ابوي: اقول تكلمي زين >>>>> ابد مايبي يربيني عالدلع والمياعه

انا: جيب لي ريد بول

ابوي: طيب ساعة بالكثير واجي

انا: لا كثيررررررررررررر ساعه

ابوي: خلاص يابنت قلت لك ساعه ويالله مع السلامه

وقفل الخط

وبعد ساعة من الانتظار والهواجيس المخلوطه باحلام اليقظه

جاء ابوي وانا عشان افتح المجال واعطي امي فرصه انها تفاتح ابوي بالموضوع اخذت اخواني الصغار وقلت وش

رايكم نلعب واحد طش وانا اللي ادوركم وراحوا يتغبون وانا طلعت لغرفتي اكمل هواجيس>>>احلى تصريفه للبزارين

وبعد كم دقيقه على كم ثانيه على كم دمعه نزلت على وجنتي من الفرحه سمعت صوت احد يطلع الدرج طق طق طق

وقلبي يطقطق معه شوي ويدق الباب ويدخل ابوي ووويجلس جنبي وصار يتنحنح ويسولف وينكت ويضحك

عاد انا قلت بنفسي: ايه هذي الفرحه وماتسوي .. ياحليلك يبه منتب مصدق ان الشيفه بنتك بتتزوج

بس عاد مليت من سواليف ابوي وابيه يفاتحني بالموضوع

فقلت: يبه خير وش عندك جايني الغرفه وتسولف؟ اذا تبي سلف عادي قل.. ماعندك الا اختك


>>>>الله من زين الهرج.. قال اختك قال

ناظرني ابوي وشكله يهوجس بتناحتي

وقال: يابنيتي الزواج سنة الحياة

قلت: طيب وش مناسبه هالحديت؟؟>>>> يعني اخلص هات من الاخر

ابوي: اليوم ام رمضان خطبتك لولدها رمضان صحيح انه يدخن

بس لا تنسين يابنيتي ان التدخين رجوله>>>>>>> امحق تصريفه..

وصحيح ان ماعنده بيت وبيسكنك مع اهله بغرفه صغيره والحمام مشترك بس كلها كم طعش سنه ويطلع له بيت

وتعيشون لحالكم >>> هذي مووت ياحمار

وصحيح ان .............

عاد انا سكككت ابوي بكحه مفتعله مني مابيه يجلس يجرّح ويسب بزوج المستقبل ويشوه الصورة الجميله اللي رسمتها

له بخيالي >>>>> امداك رسمتي الصورة خخخخخخ

سكت ابوي وخيم الصمت على المكان عاد انا تذكرت وش يسسوون بالمسلسلات لا انخطبوا

ونزلت راسي يقالي مستحيه

قال ابوي: هاه؟ موافقه؟

قلت بكل حياء واستحياء: يبه خلاص!! السكوت علامة الرضا>>>>>>ابوووك يالحيا

ابوي ناظرني وشكله يقول هالبنت مهب لم زواج بتفضحنا عند الرجال واهله

عاد انا قلت: يبه عاد متى بيشوفني؟؟

قال ابوي: ووووووشووووو؟؟ من بيشوفك؟

قلت: وش فيك يبه؟ هذي الشوفه الشرعيه..

ونزلت راسي من الحيا>>الله ياخذك ياهالحيا

قال: مدري عاد هذي يبيلها تفكير >>>> مايبي يقول مانبيه يشوفك عشان لايهوّن ..احتراما لمشاعري >>>كن عندي

مشاعر اصلا

طلع ابوي وجلست لحالي ورجعت للهواجيس والتفكير وجبت الوان خشبيه عشان الوّن صورة رمضان فارس الاحلام اللي

راسمتها له بخيالي

ومن بكره قمت بدري سويت فطور لخواني وقلت لهم ترى انا اللي باسوي الغدا بس قولي وش مشتهين>>>ابتسنع

وفكيت الجديلتين وصرت اسوي جديله وحدة >>>> احلى ياللي بتغير الستايل

وصرت احط روج قبل اطلع من البيت واستشور شوشتي واقعدلي ساعة قدام المرايا>>>بزعمي خلاص صرت حرمه

واخوي ينكت علي ويقول: اول مرة اشوف حرمه بشنب

اصلا هذي مب اشكال تزوجونها

بس سويت نفسي ماسمعت عشان لااجرح مشاعري >>>احلفي

من بكره واشوف اهلي مكتمين ومحزنين وحالتهم حاله عاد انا قلت لهم :خير وشبكم؟ مافيه شي يستاهل هالحزن؟

قالت امي: المعرس مصمم الا الا يبي يشوفك قبل الزواج

قلت: افاااياذا العلم.. اذا كذا بعذركم تحزنون وتلبسون اسود بعد.. وش السوات يمه؟

قالت: مافيه الا انا نجيب لبنانيه نخليها بالواجهه

قلت: يمه تبيني ابدأ حياتي مع رمضان بكذبه.. لأ مقدرش ده صعب اوي >>>ماتركب بلهجتنا

قالت: ياكذا يامابوه عرس<== من الرس الاخت

قلت: لاااااا كله الا العرس.. بس وش رايك من نجيب؟ نتالي معماري والا هيفاء وهبي؟

قالت: اقووول بس اسكتي وخليني اعرف افكر

وبعد التفكير قلنا مالنا الا رمضان يشوف خشتي لانه كذا والا كذا بيشوفها يعني اصيرعانس ولا ارجع لاهلي مطلقه >>>

كذا امي شرحتها لي

بس تصدقون اني تخيلت نفسي بفلم مصري وراجعه لبيت اهلي مطلقه ومعايا حتت عيّل

>>>>>>>>>>>>>>ياشين القرويه لا تاثرت بالمسلسلات

وجا اليوووووووووووووم وانواع الرجه بالبيت تصدقون اني تروشت ثلاث مرات لاني كل مااطلع من الحمام انحف شوي

>>> بلاه من الوسخ المتراكم>>الله يحوم كبدك

وووووووجت اللحظه الحاسمه وجا ابوي وقال: يالله الرجال يحتريك؟

قلت: منهو؟ اي رجال؟ >>>>>> ياشين اللي يسوون نفسهم مايعرفون

قال: المعرس بعد منهووو؟

قلت: معرس لمين؟ >>>> هالمره مب استهبال بس ابيه يقولها ابي اتاكد اني منيب احلم

قال ابوي: هوووووهوووووو علينا.. شكلي باهون

قلت: لا خلاص.. رح اجلس عند الرجال عيب نخليه لحاله وانا بتطمن على شوشتي وخشتي وجايه وراك

وفتح ابوي باب المجلس عشان يدخل وانا اللي المح اقبح مخلوق شفته بحياتي قاعدن ومتربع بمجلسنا..لا ويشرب قهوة بعد

خنقتني العبره وحامت كبدي شوي بس بعدين تذكرت ورحت ناظرت شكلي بالمرايا عشان اتقبل شكله>>>>>> خطه

سريعة المفعول

دقيت الباب عليهم وقلت: يبه عندك احد؟ >>>>> لاياشيخه

دخلت وانا اسوي نفسي اكح واعاطس واتثاوب بقصد اني اقدر احط ايدي على وجهي عشان لايتمقل بملامح خشتي

الموقره ويهون.. وطول منيب جالسه على ذاالحال

وشكلي طولت وانا قاعده لان ابوي قال: طسي يابنيتي عاوني امك بالمطبخ تراه ماتدبر شي دونك >>>>> مايعرف
يصرف والا يمكن بيعلم المعرس اني قرمه وراعية بيت

قلت: ان شاء الله يبه ........... وطلعت

بعدها بكم يوم وانا متربعه بالعش الزوجيه وعشنا في سبات ونبات وخلفنا صبيان وبنات كانوا مثال حي للقبح والدلاخه

بس ولو مايمنع انهم اطفال ابرياء مالهم ذنب ان جينات شيون اتحدت وانتجتهم


لكن يافرحة ماتمت والباب اللي يجيك منه الريح سده واستريح>>>جابت العيد بذا المثل

عيال الحرام كانوا لنا ولسعادة بيتنا بالمرصاد وضحكوا على عقل رمضان واسحبوه معهم لحياة الدشرة وصار يسهر بره

البيت ولا يرجع الا بانصاص الليول

ومع الوقت حسيت انه من جد تغير وماصار يلعب مع شعبان وشوال وربيع ثاني >>>ذولا عيالنا ..وذي القعده وذي

الحجه>>عاد ذولا بناتنا

وجت الطامه الكبرى وامسكوه يتاجر بالمخدرات واحكموا عليه مؤبد بعدين خففوا الحكم وعطوه اعدام


>> قد سمعت ان الاعدام اهون من المؤبد بحكم ان المؤبد عذاب نفسي وحسي وجسدي عكس الاعدام يقطعون راسه

وانتهينا>>>>> يحلفون ان بهالبنت عرق ارهابي

وياليت الامور وصلت لين هنا واهجدت.. لا..

وجات هيئه حقوق الانسان وقالوا لي انتي تعذبين وتسيئين التعامل مع اعيالك

وهكذا فقدت زوجي واولادي ورجعت لبيت اهلي



مايستفاد من السالفه:

شركة الاتصالات اربحت من كم واحد قرأ الموضوع وهو متصل

-
-
امـ محمد
-
فامان الله[/align][/frame]

[دانة 1]

هههههههههههههههههههه

طووووووط طوووووط

ابوي: الوووو

انا: هلا يبه وينك فيه؟ تراك طولت متى تجي؟

ابوي: ليه وش فيه؟

انا: لامافيه شي بس اشتقت لك >>>>> ابووووك يالسبب

ابوي: اقول تكلمي زين >>>>> ابد مايبي يربيني عالدلع والمياعه

انا: جيب لي ريد بول

خطييييييييييره

[الــ ـجـ ـازي]

ههههههههههههههههههههههـ

يسلمووووووووووووو دااانه على تعقيبك اللطيف

:b

[مجموعة إنسان]

يالله يا رب يا كريم ما يعدموه وتتزوجيه بعد السجن المؤبد ويطلع بكفالة ..


وانا بجيب الرقاصة لزواجك .. هدية مني لكي









1















2
















3


















وهز ياوز

[الــ ـجـ ـازي]

ههههههههههههههههههههههههههههـ
هههههههههههههههههههههـ
ههههههههههههههههـ
هههههههههههـ
ههههههههـ
هههههـ
ههههـ
ههـ
هـ

ايه والله اذا السالفه فيه نفشه شعر ورقص

ما يخالف

[صغير بس أهبل]

أقول يالجازي حسبي الله عليك

أطالب بأقصى العقوبات على زوجك لمتاجرته في المخدرات
وأطالبك إنت بدفع رسوم إتصالي لمدة((نصف ساعة))


ههههههههههههههههههههههههههههههههههههههههههه

والله حلوة يالجازي الله يعطيك العافية

[الــ ـجـ ـازي]

[frame="7 80"][align=center]

اقتباس الرسالة الأصلية كتبت بواسطة صغير بس أهبل أقول يالجازي حسبي الله عليك أطالب بأقصى العقوبات على زوجك لمتاجرته في المخدرات وأطالبك إنت بدفع رسوم إتصالي لمدة((نصف ساعة)) ههههههههههههههههههههههههههههههههههههههههههه والله حلوة يالجازي الله يعطيك العافية

اول شي ياهلا فيك بيننا اخ عزيز مكرم اذا ما تشيلك الارض نشيلك احنا

شوف انا راضيه اخليخ بالسجن :e بس لا تقول اعطيني فلوس
ترى كلش والا الفلوس[/align][/frame]