شخصيتك على طريقة ستار بكس

[بنت مملكة الحب]

22 dec -19 jan
شخصيتك بشكل عام !
لوووووووول انت عاد نكتة من قلب يا الآيسد تي لوول .. يعني اللي اول مرة يشوفك
ويقعد معاك يكتشف ان دمك عسل وراعي نكته ومرحك عفوي

بس عيبك انك شوي انطوائي وهالشي يسبب لك مشاكل ساعات .. و عندك طموحات
غريبة وعجيبة بنفس الوقت ساعات تكون مستحيله


الحب
مو من النوع اللي يطيح بالحب بسهولة .. ولا تعترف فيه بسرعة .. وهم ما تعترف
بالحب من أول نظرة

اممم .. وانت من النوع الحذر جدا جدا جدا بأي خطوة عاطفية تقدم عليها .. وتفضل
دايما سواء ريال ولا مرة العزوبية او العنوسة حق البنيات

بس اذا حبيت ... يا سلام عليك .. تصير ملك بالعاطفة والرومانسية

الصداقة
تعتبر صداقاتك من النوع الي تعمر " شبيهة بالديناصورات" وتتضمن وااايد من
الايام الحلوة اللي لها طابع من المرح والوناسة كونك شخصية مرحة .. وتونس
صاحبك بالمفاجأت الغريبة

بس عيبك خجول مع ربعك شوي وماتاخذ راحتك مع ربعك اذا كان بينهم غريب


الشغل
تفضل الوظيفة الي تضمن لك الامان المادي .. مثل الوزارات والشركات الخاصة ..
وكونك حذر وعندك عقل يوزن بلد هم تقدر تبني حق نفسك امبرطورية أو مشاريع
عظيمة وتقدر تخمن الصعوبات والمشاكل الي ممكن تواجهك ..
عموما انت تفضل المجالات الهندسية والمعمارية اكثر من غيرها

الإيجابيات
واقعي
حذر
دقيق
مرح ونكتة
منظم


السلبيات
أناني شوية
عنيد
ما تسامح بسرعة
تقليدي زيادة عن اللزوم

<><><><><><><>

20 jan - 19 feb

شخصيتك بشكل عام !
شوف يالـ سينامون .. اللي يميزك عن غيرك من الشخصيات .. ان أي شغلة
تسويها لازم تكون مميزة سواء بـ شغلك او علاقاتك الإجتماعية أو أو أو .. الصراحه
عيني عليك باردة

وعندك حس إنساني كبير .. يمكن من أكثر الشخصيات اللي فيها جانب انساني ...
ومو من النوع التقليدي بحياتك كلش


الحب
اممم .. صعب ونادر انك تحب بجدية أو بعمق وعواطف وهالشغلات ... بس اذا
حبيت دايما تحاول انك تنجح علاقتك مهما كانت فاشلة ومو راضية تمشي صح ..
يعني ما تستسلم بسرعة اذا كانت العلاقة فاشلة مثل ما قلت لك

وبما انك من محبي الابتكار والشغلات الطيبة .. دايما تفاجئ حبيب الألب بأبتكاراتك الزقرتية .. سواء شغلات مادية أو سوالف وشغلات حلوة

الصداقة
اكثر شخصية ناجح من ناحية الصداقة ... تدري ليش ؟ لأنك تقدر تعطي صاحبك كل
اللي يبيه ويحتاجه سواء طلب منك هالشي أو لأ

والـ سينامون معروفين بإخلاصهم حق ربعهم .. لـ درجة انك تذكر ربعك اللي
معاك بالروضة !! >> قوية ادري لوووووول


الشغل
تميل إلى مجالات الشغل الي فيهم مجال شوية ابتكار وتفنن .. ما يناسب الشغل
الروتيني وايد يعني

وبما انك ناجح إجتماعياً .. فتصلح لك المجالات والشغل الاجتماعي وايد .. مثلا
سوالف العلاقات العامة يعني هالطقة


الإيجابيات
مستقل
منطقي
مثابر
إنساني
إجتماعي


السلبيات
ردود أفعالك حدها تصدم الواحد وما يتوقعها أحد
عنييييييييييييد
غريب الاطوار الله يهداك
ملوول وتطق جبدك بسرعة .. وتخلي الناس تمل منك بعد


<><><><><><>

20 feb - 21 march

شخصيتك بشكل عام !
إييه يالـ موفن شنقدر نقول عنكم .. ناس عندها طاقة عجيبة و تقدر تسوي اكثر
من شغله بوقت واحد

اللي يميزكم انكم عاطفيين واااااايد .. لدرجة ان لو شفتوا ياهل قاعد يبجي عادي
تطقونها بجي وياه لول


الحب
بما انك عاطفي .. فا يابخت من يحبه قلبك .. لانك تغرق حبيبك بالحنان والعواطف

والحلو بعد انك من النوع الي يعبر عن حبه بكل الاوقات حتى لو على الغدا ..
وتحب انك تقول كلمات الاعجاب والمجاملات لحبيب القلب حتى لو كان الشي
مايسوه .. يا سلام عليك والله
بس مع كل هذا مقرود بعلاقاتك العاطفية .. يالله هذي الدنيا لوول


الصداقة
ربعك جزء لا يتجزء من حياتك واهم االاذون الي تشكي لها اذا صادفتك أي مشكلة بحياتك .. وانت سهل المعاشرة بين ربعك .. يعني حبيب

لكن عيبك مع ربعك انك تخلف بمواعيدك معاهم وايد .. ولانك ماتعرف شي اسمع
اعداء وكره يستغلون الناس هالشي ضدك ويجرحونك


الشغل
بما ان مواعيدك مش ولا بد مثل ما قلنا .. فأنت تفضل الاعمال الحرة الي
مافيها انضباط يعني لو كنت ضابط او مهندس بالبترول يطردونك من اول
شهر .. كيكيكيكي

وهم يالموفن انت من النوع اللي يكره الاعمال الي فيها ازعاج مثل المطار
وهالسوالف يعني .. وتفضل الشغلات اللي تتصف بالطابع الهادي والروتيني شويه


الإيجابيات
عاطفي
حبوب وخوش ولد
ما تعرف الحقد
حدسي

السلبيــات
متشائم
كسول
متردد
مماطل
تفكيرك مشوش شوية
وساعات تافه لووووول

<><><><><><>

22 march - 20 april

شخصيتك بشكل عام !
عاد انت معروف .. أكثر شخصية اندفاعية .. يعني وايد تحب تثبت نفسك وبالكويتي
وايد شاد حيلك لوول
بس فيك خوش طبع انك بسيط وما تحب تتصنع او تتكلف بالحجي وايد .. هالشي حلو .. برافو كيكيكي


الحب
انت من النوع اللي وايد تحب الاكشن بالعلاقة ... تحب الحياة العاطفية تكون
مشعلله على طول .. يعني تكره الروتين اللي يصيبها .. بس ساعات تصير دعله
وحساس زياده عن اللزوم الله يهداك .. لوول أقول ساعات

بس الخصلة المو شي عندك ان ما فيك صبر كلش .. خاصه لما تحاول ويا الحبيب
بمشكله أو اي شغله .. وتلقى ان ماكو تجاوب .. تبدي شوي شوي تكش عنه ..
فـبهالطريقة تخلي الطرف الثاني يحس انك ما تفقه بفنون الحب.. ! يعني واحد ما
يعرف شلون يعالج مشاكله العاطفية .. او ممكن يظن ان اسلوبك وايد حازم وصارم
وقاسي عليه

وانت من النوع اللي تعتقد ان القلب القوي اهوه اللي يقدر يبني علاقة قوية حلوة ..
عشان جذي دايماً تحاول تبين أنك شخص صاحب شخصية صعب التأثير عليها


الصداقة
تعتبر الصداقة شكل من أشكال إكتساب الخبرة والمعرفة .. بمعنى انك تحاول
تكتسب أشياء يديده من أصدقاءك
وهم انت من النوع اللي يحب يقترح مشاريع وأفكار يديده على ربعه


الشغل
تكره انك تشتغل بمكان أموات ! بمعنى آخر مكان ماله حياة أو هادي زياده
عن اللزوم وروتيني وممل ... تحب الأماكن الحيوية اللي فيها حركة وأكشن وتغيير

وفي بعضكم يا عيال الـ اسبريسو متعتكم الصجية أنكم تشتغلون بأماكن فيها
آلات أو أجهزة .. مثل مصانع السيارات وهالطقه .. بس طبعا ماكو عندنا مصانع
سيايير .. لوول .. يعني نقدر نقول تحبون تشتغلون بالبترول والاماكن الصناعية
مثلا يعني


الإيجابيات
متحمس
واقعي
عايش يومك
إداري ممتاز وقائد خطير
جريء من قلب !


السلبيات
أناني
متهور
ما فيك صبر
تحب اتسيطر على كل شي .. بالكويتي اتشريب كيكيكي
تنفعل وتعصب بسرعة
ما عندك لباقة بالحجي
ما عندك حل وسط

<><><><><><>

21 april - 22 may

شخصيتك بشكل عام !
انت انسان ما تحب التغيير وايد .. تحب ان تكون حياتك فيها أمان واستقرار
بدون تغيرات وتقلبات زيادة عن اللزوم

وعيال الـ بلاك كوفي معروف عنهم أمانتهم حتى ان الناس تثق فيهم بسرعة ..
من قدكم والله


الحب
انت من النوع اللي تعرف تستغل كل لحظات الحب .. وهم من النوع اللي
مستحيل يتخلى عن اللي يحبه أو يتراجع بأي شكل من الأشكال

ورغم انك تحب تدلع اللي تحبه وتوفر له كل اللي اهوه يبيه وما تخلي عليه
قصور .. إلا انك تحب تتملكه وتخليه يمشي تحت شورك وما يعصيلك أمر ..
انتو مشكله يالـ بلاك كوفي الله يعين اللي بيرتبط فيكم


الصداقة
رفييج نصوح من قلب .. عندك خبرة بمجالات وايد وتفيد غيرك فيها مثل
سوالف البورصة واسعارها .. احسن المطاعم بالديرة .. وسوالف حلوة جذي يعني

بس رغم كل هذا .. تخلي ربع يرتفع ضغطهم والسبه اسلوب حياتك الروتيني
اللي ما تحب انك تغيره


الشغل
تحب وظيفتك تكون ضامنة لك الامان .. وتكون روتينية .. ماتطلب منك أي تغيير
سواء كبير ولا صغير
مثل البنوك أو البورصة وغيرها من الاعمال الي تتطلب الاستمرارية على
نمط واحد .. وهم تعجبك هالسوالفلان شغلك بالمجال المادي يخليك تحس
بالقناعة والرضى

ومن جهة ثانية عندك مهارة بالاعمال التجميلية مثل سوالف هندسة الديكور ..
أو جراحة التجميل .. لانك تقدر الجمال وايد


الإيجابيات
محافظ
شقردي ويعتمد عليك
داهية وذكي
تحب من قلب !
ذويق


السلبيات
متساهل مع نفسك
عنيد عنيد عنيد !
مادي بدرجة فضيعة
هادي وصخة حدك
خجول .. وساعات بليد !

<><><><><><>

22 may - 21 june

شخصيتك بشكل عام !
على طول مشغول ! على شنو مادري لووول ... بس قمة سعادتك لما تنتهي
من شغلك بنجاح باهر

وانت من النوع الي يعشق شغله اكثر من أي شي .. ما تعرف شي
اسمه راحة .. بالعكس تعتبره العدو الاول لك .. وأحلى شي فيك انك تكون
جاد وسيريس بأداء أي مهمة تقوم فيها .. يعني ما عندك خري مري الشغل شغل



الحب
ماتنطبق عليك صفة الصدق والثبات اذا كان الموضوع يتعلق بالعلاقات العاطفية ..
ليش الله اعلم

بس انت من النوع اللي يستخدم طرقه الذكية عشان يكسب محبوبه .. وتبذك جهد
عجيب عشان تتكيف مع اللي تحبه.. وعلى طول تشجع وتمدح وتحفز الحبيب ..
من قدهم



الصداقة
الي يرافجك مايمل منك .. لان رفجتك تعطي دفعة من النشاط والعمل المستمر ..
يعني تخلي الناس كلها تحس بحيوية وطاقة

عندك قدرة عجيبة على كسب الصداقات .. وانت بطبعك اجتماعي حباب وبسرعة
تدش القلب من دون ما تطق بابه حتى



الشغل
بما انك تتمتع بالذكاء الخطير والفريد من نوعه .. فـ انت تقدر تدخل أغلب
مجالات الشغل .. لانك تتميز بسرعة التكيف وين ما تكون .. بس غالبا تحب
مجالات الإعلام مثل الصحافة والتلفزيون والاذاعة إلخ .. يمكن لأن فيها احتكاك
مباشر مع الناس



الإيجابيات
عندك قدرة عجيبة على التعبير
فطين
تحب التفاصيل
مجازف درجة أولى



السلبيات
ملقوف
وسواسي
ينقصك التركيز
كلكجي ومكار .. يوووز

[بنت مملكة الحب]

22june-22july
شخصيتك بشكل عام !
اييه يا التشيز كيكيين .. انتو أصحاب شخصية حلوة وحبوبة ولذيذة بعد .. الحلو فيكم
انكم إذا حبيتوا شخص .. تهتمون فيه وتحمونه وتسون له كل شي من كل قلبكم
وبعيد عن المجاملات .. بس القهر انك تسوي هالشي حق قلة من الناس اللي
يدشون مزاجك .. لوول

مشكلتك الاولى والاخيرة .. المزاج ! الي يسبب لك مشاكل مالها اول ولا تالي مع
الناس اللي حوالينك وخصوصاً اللي ما يعرفونك عدل

بالنسبة للتشيز كيكاات البنات .. من بين كل الشخصيات انتي اكثر شخصية معبرة
عن الامومة بشكل واضح .. وايد وايد متعلقه بالأسرة والأهل .. الله يهني ريلج فيج



الحب
ليمه اتكرفس بالحب اتكرفس من قلب .. يعني تحب بمعني تحب ! عاشق عاطفي
شغوف
بس عيبك انك قلابي وايد الله يهداك .. ومزاجك يتحكم فيك وايد .. واللي يحبك
راح يحس بمزاجك المتقلب بشكل واضح .. ساعات مزاجك يعطي جو بالعلاقة ..
بس ساعات الله لا ياوريهم شرك ! تخلي العلاقة جحيم ! لوول


الصداقة
رفجتك حلوة ومثيرة بنفس الوقت .. وهم مدتها طويلة .. وتحاول قد ما تقدر انك
تحافظ على صداقاتك كثر ما تقدر .. مع انها شوية .. كونك انسان ماتثق بأي احد
الا بعد ما يعجبك عدل ويدش مزاجك
وانت تعتبر المتنفس حق ربعك .. بمعنى ثاني انك الجتف الي يبجون عليه والاذون
الي يشكون لها وتسمع لهم بأنصات حلو



الشغل
ماتواجه صعوبه انك تلقى شغله تناسبك .. لانه عندك مواهب تأهلك انك تشتغل
بكافة المجالات .. وخاصة مجال الطبخ او الفندقة .. لوول
ومع هذا عندك قدرة انك تدير الشغل كله بروحك لأن عندك مهارات وشغلات حلوة
.. وهم تحب انك يكون لك شغل خاص فيك بعيد عن المشارك .. مثل المهارات
اليدوية والعمل الحر



الإيجابيات
احساسك بالشغلة قبل لا تصير يخرع !
ذاكرتك قوية
حقاني
موهوب
حبوب


السلبيات
مزاجي
حساس
للبنات : أم متسلطه من قلب
صراف ومبذر
غير واقعي
ما تسامح بسهولة

<><><><><><>
23july - 23aug

شخصيتك بشكل عام !
تحب انك تكون لك مملكة خاصة فيك .. مهما اختلفت
بيئتك وظروفك .. وهم تموت على شي اسمه تنظيم

قيادي بشكل ملحوظ .. ومسيطر على أي عمل تقوم فيه ... أحلى شي فيك انك شهم
وقوي وشجاع بقراراتك .. وتكره شي اسمه التردد بـ أي شي تسويه ناوي تسويه


الحب
عاطفي وااايد .. واغلب اللي حوالينك يلاحظون
هالشي فيك ... لدرجة انك اذا حبيت .. تهتم بحبيبك وتخاف عليه من نسمة
الهوا الطايرة

وهم انت من النوع الكريم بحبك ومعطاء .. وتحب تبين عواطفك بأحلى طريقه
وافضلها .. وتتميز بثباتك بالحب



الصداقة
كريم مع ربعك من قلب .. يعني اذا قااااز ورايح
مطعم من هالمطاعم وياهم .. ماتخلي احد يفج بوكه غيرك
تحب ربعك يكونون من مستواك المادي .. عشان يجارونك بالماركات واللبس وهالشغلات .. وهم عشان ما تحس بالفرق المادي بينكم لان هالموضوع يزعجك
بدرجة كبيرة ..
مستعد انك تعتذر حق ربعك اذا جرحتهم ... وهالشي مميز فيك .. والأحلى انك
اتفنتق او تبدع بالاعتذار يعني بوكيه ورد شغل عدل .. أو شغلات جذي .. على
راسي



الشغــل
تحب انك تكون مركز محط الانظار ... وتكره انك تكون
في موقع التابع .. يعني تفضل انك تكون في منصب المدير الاداري مثلا .. او
رئيس قسم .. المهم منصب إداري قيادي مهما كانت ظروف أو طبيعة الوظيفة



الإيجابيات
كريم
صادق
محترم
خلوق
متفائل
طموح ونشيط



السلبيات
بعضكم فيكم غرور
دمك ثقيل شوي لوول
قاسي
دكتاتوري
تخش بقلبك وايد

<><><><><><>

24aug - 22sep

شخصيتك بشكل عام !
إيــه يالـ روضتين لوول .. امم .. انت مشهور بحبك للتنظيف والترتيب والنظافة يعني ..
وهم تحب الاناقة وايد .. وعيبك انك حساس ووسواسي وااااااااااااايد !! وتوصل معاك هالسالفة انك تغسل ايدك 60 مرة باليوم .. لدرجة تخليك تفقد طعم اللحظات الحلوة اللي
تمر بحياتك والسبة هالوسواسية

وهم انت من النوع الجدي بدرجة واضحة للكل .. وتفكر بعقلك وواقعي


الحب
الحب عندك دايما تبيه يكون كامل مافيه أي شوائب .. عشان جذي دايما تنتقد حبيبك ..
وهالشي يزعجه منك وايد ترى !

يعني انت بالحب متطلع واااااااايد .. وتوصل معاك السالفة للحنة وإزعاج الطرف الثاني
بالنقد .. يعني اذا شي مو عاجبك فيه .. الله يعينه ... لأنك ماتحاول تراعيه .. والصفه
الغالبه عليك بهاللحظة اهيه الأنانية



الصداقة
تعتبر بالنسبة حق ربعك يد العوون الممدودة على طول .. دايم تختب وتشد حيلك اذا
صادف احد من ربعك أي مشكلة .. يعني شقردي وقت المشاكل اللي تواجه ربعك



الشغل
تميل إلى الشغل إلى فيه نشاط ونسبة من البحث .. يعني مثل مراكز الابحاث .. او حتى
الشغل إللي يتطلب منك التنقل من مكان لي مكان .. امممم يعني مثلا مجال الزراعة

وبما انك انسان تحب الكمال وكل شي عندك لازم يكون اوكي ... تنجح وايد في
مجال النقد .. بشتى انواعه سواء صحفي او فني او ادبي .. المهم انك ناقد
ممتاز .. وساعات لاذع



الإيجابيات
مساعد وشقردي
منطقي
نظيف ومرتب
حنووون
هاب ريح ونشيط



السلبيات
شكاك وايد وايد .. لدرجة انك تخطئ بنسبة كبيرة
سوداوي ومتشائم
مو مستقر عاطفياً !
ساعات تصير تافه مع احترامي لووول !

<><><><><><>

23sep - 22oct

شخصيتك بشكل عام !
سهل المعشر وحبوب .. وتتجاوب مع اللي حوالينك بسرعة .. يعني ماعندك
مشاكل من هالناحية ... لدرجة انك تقدر تخفي مشاعرك لو كنت متضايق او
مهموم وتبين حق اللي جدامك انك انسان مرتاح ومستانس وعادي .. وهالشي
اكيد بيسهل عليك سالفة الاتصال والتجاوب مع اللي معاك

شغلة ثانيه .... اممم .. انت يالـ كبتشينو .. نقدر نقول انك متردد شوية بقراراتك ..
تفكر وايد فيها يعني ... بس عاد اذا اتخذت قرارك مستحيل تناقش احد فيه...
يعني خلاص اتخذته لحد يحاجيك موليه


الحب
الحب يدرعم بقلبك بسهولة وبـ بساطة بعد لوول .. وااايد عاطفي ويا الحبيب ..
وتحب دايما انك تغطيه بالحب

أحلى أحلى شي فيك يالـ كبتشينو .. انك كريم وااااااايد ويا الحبايب ... وكرمك
يطلع بالحجي المعسول والتغزل والرومانسيات الطيبة هذي .. غير الهدايا اللي
بين فترة وفترة والمفاجآت والسوالف الحلوة اللي اتيي منك .. يعني ربه يحبه
اللي يطيح عليك لووول



الصداقة
ساعات تصير مصدر الامان حق رفيجك .. والديتول حق جروحه وهمومه اليومية
>>> جيكو عالديتول بس لوول

لا بس صج تقدر تعيشه بجو يناسب مزاجه ونفسيته .. لان عندك قدرة تخليك تقدر
تعرف موود ومزاج رفيجك قبل لا تشوفه او تكلمه ! سبحان الله



الشغل
تنجح وبشكل ملحووظ بالمجال الدبلوماسي .. لانك تسمع وتتكلم بلباقة تميزك عن
غيرك ... وغير هذا تتميز بالمجال الاجتماعي .. كـ أخصائي اجتماعي مثلا أو
دكتور نفسي .. لأنك تعرف تكسب ثقة الناس بسرعة



الإيجابيات
متعاون وخدوم
ونيس
متفهم
حبوب



السلبيات
متردد
قلق وتوسوس
عاقد النونه لوول
تبي السلام مقابل أي شي
كلكجي ساعات

<><><><><><>

23oct - 22nov

شخصيتك بشكل عام !
عاد انت يالـ هوت جوكليت من اكثر المميزات اللي تميزك عن غيرك ...
اهي اللقافة ! كااك .. لا لا تفهمني غلط ! اللقافة اللي فيك من نوع ثاني .. يعني تحب
تتطلع وايد وتفهم اللي يدور حاولينك .. بكل مجال عندك ولو نتفه من المعرفه
والثقافة فيه

ونوعك بعيد وايد عن السطحية ... يعني شخص فاهم ... ايي ونقدر نقول انك عاطفي
بشكل عام مو بس بالحب .. عواطفك ساعات تغلب على تفكيرك بس مو دايماً ..

الخصلة الشينة فيك انك متذمر و وااايد واايد تتعنفق اذا شفت شي مو عاجبك !!!
بس الحلو فيك ان سرك بـ بير يعني الناس تأمن عليك ... وهم ساعات الناس
اللي ماتعرفك تحسك من النوع الغامض


الحب
تتميز بأنك عاشق مندفع من قلب ... وعندك تجارب وايد من قبل .. بس المشكلة
انك لو انجرحت ما تنسى هالجرح بسهولة .. هذا اذا كان مستحيل .... وحتى
الماضي مهما كان حلو أو مر ما تنساه بسهولة ...

اممم .. شوف هوت شوكلت ... من الأسباب الرئيسية اللي تخليك تنفصل عن
حبيبك بعلاقاتك العاطفية .. غيرتك العنيفة مع الي تحبه ! واللي تمنع الناس أو
حبيبك انه يتأقلم مع هالوضع .. وساعات توصل بالهوشات العاطفية إلى طرق
العنف .. بمعنى ثاني عادي تعطي الحبيب طراااااق !! لا يحووشك لول



الصداقة
تدري شنو مشكلتك اهني ؟ إن اذا كانوا ربعك مو من مستواك الفكري صداقتكم
ما تدوم وايد .. لانك تحب تتفلسف وتتشيحط بمعلوماتك الوفيرة بأي مجال كان ..
انته مشاكل

بس رغم هذا .. رفجتك حلوة وااايد .. وفيك طبع انك تتجنب تدخل بتفاصيل
وخصوصيات ربعك .. ولا تحب احد يدخل بخصوصياتك ... تحاول تكسب ربعك
بثقافتك ومعلوماتك العامة + مقعدك اللي يونس



الشغل
انت معروف .. تحب تكد وتكرف ! وتحب الدراسة بعد .. يعني عادي عندك تدرس
7 سنين طب وعقبها تكمل دراسات عليا مادري جم سنه !

وغير هذا تبدع بمجال التدريس .. بس طلبتك مايحبونك كونك حازم وياهم وما
عندك خري مري

وهم ممكن انك تتجه لـ سوالف المحاماة أو القضاء .. او ممكن انك تكون تحري
او وكيل نيابة مثلا! لأنك بارع بهالسوالف



الإيجابيات
مجتهد
مبدع حدك بالإستجوابات والتحقيقات
ماترضى بالظلم على غيرك ولا تسكت عنه
ناقد ذاتي



السلبيات
انتقامي من قلب !
ساعات مغرور
ما تسامح بسهولة
تعشق التملك


<><><><><><>

23nov - 21 dec

شخصيتك بشكل عام !
حدك حدك صريييح وتقطها بالويه ومايهمك احد ... بس تدري شنو الحلو فيك صج ..
انك متفائل وايد حيوي وحبوب حدك .. وعندك حس عجيب بالمرح وتونس

حياتك كتاب مفتوح .. بس حق ناس معينيين جدا جدا جدا ! وفي منك نوعين ... يا
هادي وتحب انك تدرس وتقرا كتب ادبية وهالطقة .... أو انك تكون متهور ومغامر
درجة اولى وراعي نكته وساعات يالـ كراميل فرابتشينو تكون مكس بين هالنوعين ..
يعني توو إن ون لول



الحب
بالحب تصير خطير وخيالي حدك .. بمعنى انك تسوي حق اللي تحبه .. يا دهينه
لا تنكتين ... واي شخص أصلا يتمنى لو يكون حبيبك خاصة البنات .. لأن الفرابتشينو
الريال يتمتع بحس عاطفي لذيذ .. واحلى ما فيه انه متفهم يقدر ظروف حبيبه ..
وفوق هذا .. عندك ذوق حلو بالهدايا وهالسوالف .. واللي دايما تكون مميزة

بس عندك مشكله .. واللي إهيه انك تحب بعيونك قبل قلبك ... يعني اتنح لو شفت
الحلات .. بس اهم شي انك عقب تقدر تفرق اذا هالعلاقة ممكن تستمر ولا لأ
من خلال عواطفك وعقلك


الصداقة
بين ربعك انت صاحب النكت اليديده والشغلات الغريبة .. وتكون نكتة القعدة ووناستها ..
بس اللي يبعدك عن ربعك ويخليك تنعزل عنهم .. لما يخونونك ويجرحون مشاعرك ...
خلاص تبدي تكش عنهم

بس اللي يميزكم أن في بعضكم يالـ فرابتشينوااات .. رغم كل المشاكل اللي تصادفونها
مع ربعكم ما تنسونهم وتظلون على اتصال معاهم .. يعني بعضكم قلبه ما يعرف
طريج الكره



الشغل
تبدع حدك في المجالات اللي تحتاج ابداع وافكار وشغلات يديده .. لأنك متميز بالإبتكار
والذوق العالي

أهم المجالات اللي تناسبك .. المجال الادبي من كتابة شعر او روايات .. أو المجالات
الفنية .. أو أي مجال يحتاج لذوق عالي .... وغير هذا .. ممكن تمشي بالمجال
التجاري .. مثل الاسهم والعقارات والاستثمار والخ الخ الخ



الإيجابيات
متفائل
صريح
مخلص وصادق
حبوب ومرح
ذويق وفنان



السلبيات
وايد تطنقر الله يهداك
اذا عصبت .. ما تثمن كلامك
بارد لدرجة تنرفز اللي جدامك
ساعات تصير حساس
فيك شوية كسل


<><> تقبلــــوا تحيــــاتي <><>

[almulla_11]

وايد حلو موضوعك شكرا :b

[الــ ـجـ ـازي]

ما فهمت شي >>>>> :b


صاير الغباء من طبعها


ـــــــــــــــــــــــــ

[بنت مملكة الحب]

العفو ومشكووووووووورين على المرور